August 28, 2023; Tukin dar 8 rik hma deuh khan Truck, MZ registration S. Kapthanga, Bethlehem, Aizawl khalh chuan Silchar bul Rangirkhari ah tihpalh thil ah Naga lam mi a chil hlum a, a tir lamah kawngpui dan nimahse, boruak duhawm lo thleng a awm zui lo.

Silchar Branch YMA president K. Vanlalhriata hnen atanga ZALEN thudawn danin, Truck ah hian a khalhtu S. Kapthanga bakah motor neitu Muana, Bethlehem, Aizawl bakah bungraw neitu Silchar lam mi Raju-a leh midang pakhat an chuang.

CCTV atanga alan danin truck hian an hma a Cycle a tlan, NIT Silchar a Sweeper hnathawk mipa kum 35 mi vel, Naga mi a chilhlum a, bungraw neitu Rajua hi a tlanbo nia hriat niin, driver hi Silchar police ten an lak hnuah, traffic lam case a nih avangin traffic lamin an kawl mek.

He thil thleng vang hian tukin lam khan Rangirkhari ah kawngpui dan a ni a, tunah chuan boruak a dai tawh a, kawngpui dan pawh hi tihtawp a ni tawh.

Thudawnna Silchar YMA president chuan Silchar chhungah Mizo leh Naga te inkar a that avangin boruak duhawm lo engmah a thleng zui lo tih sawiin, he thil thleng chungchangah hian Silchar a Naga NGO thenkhatte nen chawhnu lam hian meeting an nei dawn niin a sawi.