Aizawl April 28, 2024 : Mizoram sawrkarin ration card var neite tan buhfaia subsidy a pek zat tur ennawn a ni dawn a, a zat tur erawh bithliah fel a la ni lo. Hetihlai hian National Food Security Act (card eng leh card pawl)-a Mizoramin quota a neih 7,06,296 chu hnawh khah tawh a ni.

Food, Civil Supply & Consumer Affairs (FCSCA) hotute hnen atanga ZALEN thudawn danin ration card var neite hnena subsidy pek thin ennawn a ni dawn a, a zat tur erawh tihfel a la ni lo va. Card var neite hnena subsidy-a pekna zat hi kg-ah Rs. 15 a ni mek.

Hemi chungchangah hian FCS&CA Minister B. Lalchhanzova chuan subsidy atana sum sen chu thla khatah cheng vbc. 3 vel tala tihhniam tum a ni tih a lo puang tawh.

Hetihlai hian Mizoramin NFSA hnuaia quota a neih zat chu 7,06,296 a tling a, hei hi 20,000 bawr velin hnawh khah loh a ni thin a. Tun hnaia NFSA huanga insawn luhna hun hawn chhungin quota hi hnawh khah a ni tawh.

FCS&CA hotute chuan tun hnaia insawnna hun hawn a nih chhungin card var atanga NFSA huanga insawn lut eng emaw zat an awm laiin NFSA atanga card vara insawn pawh an awm niin an sawi.

FCS&CA chhinchhiah danin tun dinhmunah Mizoramah ration card nei chhungkaw 2,86,362 an awm a, ration card-a chuang mi 11,67,024 an ni a. Ration card zingah hian card eng 25,811, card pawl 1,48,711 leh car var 1,11,840 a awm.

Ration card eng (AAY) chuan chhungkua/mi mal dinhmun ngaihtuahawm taka khawsa, a thlawna buhfai dawn loh chuan ei tur tlachham mai thei dinhmuna ding, sum thawk chhuak tura theihna nei sang lo, rualbanlo, inhlawh chawpa nung ve tawk tawk, chhan hran hrang hrang avanga dinhmun ngaihtuahawma dingte a huam.

Ration card pawl chuan AAY-te aia tlema ngaihtuah awm lo deuh, sawrkar puihna tel loa buhfai eikhawp lei zo lo; chhungkaw khawsak dan leh sum lakluh dan atanga teha chhawmdawl mamawh, vantlang ang pawha puihbawm ngai a huam.