Aizawl December 19, 2023: Congress Thalai, MPYCC Hqrs. chuan vawiin khan an President Dr. Lalmalsawma Nghaka hovin tunhnaia ration buhfai pek tihdanglam chungchangah Food Civil Supplies & Consumer Affairs Department, Directorate an tlawh. Ration sem dan thar chuan miharsa zawk leh dinhmun tha lo zawk mangang takah a siam tiin, pawi an tih thu thuchhuah an siamah an tarlang.

MPYCC President Dr. Mala chuan thuchhuah siamin, "Central sawrkarin National Food Security Act 2013 a hman tan atangin Priority House Hold (PHH) (Card Pawl) te tan Kg 5 Rs. 3 in Central sawrkarin a tum sak thin a. Mizoram sawrkarin khamkhawp lo ven nan kg 3 PHH Beneficiaries te tan AAY rate-in a pe tel thin bawk a ni (Total 8 kgs). December ni 24, 2022 khan Union Cabinet chuan thu chhuahin NFSA hnuaiah Pradhan Mantri Garib Kalyan Ann Yojana hmangin December 2023 thleng PHH Beneficiaries (Card pawl) te tan mi pakhatah Kg 5 leh AAY (Card eng) te tan card khatah Kg. 35 a thlawnin buhfai a sem tawh dawn a ni," a ti. 

Congress Thalai chuan a thlawna buhfai dawn hi a a lawmawm an tih rualin Mizoram sawrkarin PHH Beneficiaries te tan mi pakhat tan Kg. 5 an khawp kham lo tih hria a, an khamkhawp lohna phuruk nana AAY rate-a Kg. 3 a pek thin a tawp dawn nia a hriat avangin, hei hi pawi an tih thu leh Mizorama chhawmdawl mamawh ber miharsa zawk leh dinhmun tha lo zawk mangang takah a siam tiin, pawi an tih thu thuchhuah siamin an tarlang. 

Congress Thalai chuan Mizoram sawrkarin chhawmdawl leh ngaihven hlawh ngai ber (Most Vulnerable) te tan Kg. 3 AAY Subsized rate-a an lak chhunzawm theih nana ruahmanna a siam lo anih chuan an liam loh tur thu leh a tul angin miharsa zawk te leh chhawmdawl ngaite tan an ding zel dawn tih a sawi.

MPYCC chuan Mizoram sawrkarin sum a enkawl thiam loh avanga Mizoram mipui miharsa zawk leh chhawmdawl ngaiten harsatna tawk thei dinhmuna an ding mek chuan pawi an tih thu leh lungchhiat thlak an tih thu a tarlang bawk. 

MNF sawrkar hian thla tlemte sawrkarna hun leh mipuite tana rawngbawlna hun an la neih hi Mizoram mipuite tan thil tha ti ngam tawh turin a chah bawk.