Rawmi hi chiang taka hriat a tha

Admin - Jul 04, 2021

Khawvela mau hmantlak ber 25 an thlan chhuah zinga tel pha ngat

F. Vanlalpeka, IMCS, Aizawl

Mizoram hian mau (bamboo)  tha tak tak a nei a, mau-ah hian chi hrang (species) tam tak a awm  bawk a, tun hnu zela kan hriat leh kan hman tangkai bikte chu Mautak, Rawnal, Rawthing leh Phulrua te hi an ni. Hetih mek lai hian, Mizoram hian khawvela mau lian ber pathum zinga chhiar tel leh mi thiamten khawvela mau hmantlak ber 25 an thlan chhuah zinga tel pha ngat, RAWMI (D.Sikkimensis) a nei tlat mai !

Mizoramah he mau, RAWMI hi Mizote zinga hrechiangtu tak erawh an tlem tawh hle a, tunah tak phei hi chuan thangtharten an hre tawh reng reng lo. A chhan chu,  mau reng reng hian a kung dam chhung bithliah an nei vek a,  he RAWMI pawh hian kum 45 dan zela tam thih hun (a kung thih kum) bithliah a nei. Mizoramah hian Rawmi hi kan ngah lo hrim hrim a, kum 1930 hma lam leh kum 1975 inkar chhovah kha chuan Mizoram hmun hrang hrangah hmuh tur a awm. Mizoram Rawmi hi duh hun huna a bul kar a, phun nun hi thil buaithlak a ni a. Chuvangin, a kung tam thih kum 45-na ang zela a rah atanga a chi (seeds) hmanga tihpun theih chauh a ni. Mizoramah hian Rawmi nei tam tur leh phun pung tura buaipuitu an lo la awm reng reng lo va, hei vang hian a kung hmuh tur a vâng chho ta hle  chu a nih ber hi.

Kum 1975 kha a tam thih kum a ni a, kha mi kum atang phei kha chuan hmuh tur a awm mumal tawh lo va,  hei vang tak hian Rawmi hre fuh lo, la hmu ve miah lo leh a hriate sawi dan hrula inti hre em em- a sawi thin erawh kan awm thin. Zirna lama mi thiam kan neih ve te lahin Rawmi hi nikum hmasa (2019) lawk atang mai khan an thlir ve  tan lek kha a ni si a. Keini a taka kum 1968 atang tawha Rawmi chenchilh thintu te thusawi hi chu eng hawi zawng pawha finfiah ngam a ni. Rawmi hrechiangtute chuan a hlutzia leh a thatzia kan hria a; chuvangin,  tuna Rawmi la awmna hmun, Tuivawl phairuam hmuna mi hi nikum 2020 kha a tam thih leh kum (1975 – 2020) a ni a, Mizoram chhunga Rawmi pil bo mai tur ngaingam lovin, a rah atanga a chi (seeds) Ramsa (nungcha)-te nena buai tak kara inchuhin, Rawmi chi hi kan khawnkhawm ta kha a ni a.

RAWMI PIANHMANG: Mizoram tualto Mau RAWMI hi mau kan hriat theih zinga lian ber a ni a. Bul  khat (a chi kuitiah)  phun hian bul tam tak a siam thei a, hei hi Raw-hung kan ti. Rawmi hung khatah hian  kung sawm bi fe a rawn chawchhuak thei bawk. Mi thenkhatin politics thil taka Rawmi sawi nep tumin, raw pum khat man aiin a bul phun tur man a to zawk te an ti a. Rawmi tlawn khat hi Rs. 85/- man lek a ni thei lo. Rawmi tiak pakhat hi pum tam tak siamtu niin, Rawmi tlawn tam tak leh Rawmi-tuai (bamboo shoots) man tam tham tak  tipungtu a ni zawk.

Rawmi hi mau lian tak a ni a, a ding nghet em em a, a bulin a kung a lekkawh zo hle. Thil intihriaten amaha ding ngil tha thei lo, dinpui tur (supporters) thing nen lo chuan ding ngil thei lo ang hiala an sawi pawh hi dawt chiang tak a ni. Tuivawl phai lama Rawmi mual, Rawmi hmunpuiah din ngilpui tur thing a awm ngai lo. Rawmi hlang hlak a ding thulh thin. Rawmi hian a changah mit a nei ve lo va, a chang a dam a, a pum hi a lian thei hle. Chuvangin, chhuat atan an chik a, Rawmi dap hian 1 ft. leh a chanve a khuh hlup thei a, Thingzaiphek  chhuat aia Rawmi dap chhuat duhzawk khua pawh an awm. Rawmi- Dap- Chhuat hi a mam tha a, a tliang hun thin a, eng ang pawhin nawt faiin, enkawl mah ila, tluk hlauhawm khawpa nal a ni thei lo. Mi thenkhatin Rawmi chhuat hi a nal lutuk a, mi an tlu thin, te an ti mai mai. He thu pawh hi dawt a ni. Rawm-Dap-Chhuatah an tlu rup rup ngawt ngai lo. 

Mizoram Rawmi hi kan mau ngah lo tak a ni a, Mau lian leh mau chang tha tak a ni bawk. Mizote hian mau dang anga kan hman tam loh avangin emaw, kan hmuh zen sen loh avangin hmanrua atan lian hle mah se, kan hrechiang hlawm lo. Mau duap tak anga sawiho hian Rawmi hung hi han thiat ngat se, an dam chhungin Rawmi hi a duap an ti tawh lo tawp ang le! Mau chang tha tak a nih leh nih loh hre uk lo hian an sawi duap ve ngawt a ni ber e. Eng chempui pawh hmang mah sela chuti mai mai chuan an sat duap  aw-kawng  lo vang.

RAWMI AWM THEIHNA HMUN: Mizoram hi hmun vawt leh zo boruak vawtna hmun chu a ni. Chuvangin, Rawmi awmna hmun pawh hi zo lam, puallawi hmunah kan hmu tam hle. Mau reng reng hi hmun vawtah chauh an awm lo va, hmun lum lamah pawh an awm thin. Rawmi ngei pawh hi phai khawlumna hmunah pawh a awm thei tho. Rawmi a nih bik avanga hmun vawtah chauh awm thei anga sawi hi a dik lo. Mizoram boruak angah hi chuan kan khaw lum neihna hmun hi a la lum tak tak lo nge, tuna Rawmi awmna Tuivawl phairuam khawlumna hmun aia hmun dang  lum zawk hi chu a awm bik hauh lo. Tunah pawh hian a la awm reng a, chiang taka finfiah theih reng a ni. 

RAWMI HMAN TANGKAI THEIHNA: Mizoram tualto mau RAWMI hi a pum (Raw-tlawn) a len theih em avang hian hmanna tur a tam bik a, Mizoramin mau dang kan neih nena khaikhin ralah pawh, a tangkai hlei viau. Mizoramin mau kan hman tangkai dan ringawtah pawh, mau te leh mau lian inthlauh danin a hril. Mautak, Rawnal, Rawthing leh Phulrua te hi hmanrua  atana kan hman thinna hmunah, Rawmi hi a hman theih ve vek a, mau pum lian tak hman tangkaina turah erawh Rawmi a hlu zawk a, a hlawk zawk bawk.

Mau hmanga Paper, Floor Tiles, Bamboo Tiles, Mat Ply, Double Ply etc. siamna hmanrua atan Mizoram Rawmi a hlawk ber a, Mizoram Mautak, Rawnal, Rawthing tih vel hi chu  Bamboo Factory atan chuan Rawmi Note chumchiap ang lek an ni. Mau hmanga industry lian thama hman tur atan chauh ni lo, in lam leh ram lam hmanrua atan pawh mau te zawk put khawm vak vak aiin Rawmi/Raw-tlawn  tlemte hman mai chu a hlawk fe zawk. Cement concrete beam hmanruaah pawh, Mautak, Rawnal, Rawthing hman ai chuan Rawmi hman chu a rinawm zawk a, a do nghet zawk bawk. In tha tak tak neitute tan pawh Exteror/Interor-Decoration-Designing atan Rawmi hi a thain, a mawi bik.

Tual chhung, ram chhung leh ram pawn thlengin, chawhmeh atan rawtuai (Bamboo Shoots)  mamawhna hi kum tin a sang hle a. Mizoram chhungah hian tuna kan mau neih ang ang  atanga Rawtuai hralh chhuah tham sengkhawm tur hian engmah tham a awm lo. A chhan chu, mau/rawtuai duh tawka lak theihna hmun kan tih fo hi a phur chhuahna leh mihring tha lut belhkhawm hian, buaipui loh law law a finthlak. Chu bakah, Mizorama mau/rawtuai kan hmuh phak awmna hmun hi mi mal huan-lo-ram deuh vek a ni tawh. Mi mal mau/rawtuai va ruksak ringawt pawh ni ila, sawngbawl a, thawn chhuah tham rawtuai kan nei thei chuang lo. Zokhawthar atanga Kanhmun thleng rawk pawh Mau tlahlang zawng ila, duhkhawp lak tur a awm tawh lo. Chuvangin, Rawmi  chiah hi Rawtuai atana thar chhuah tham, sawngbawl tham leh hralh chhuah tham nei tura Mizoram mau kan neih zinga kalpui theih awmchhun chu a ni. Rawmi-tuai (D.Sikkimensis Bamboo Shoots) hi ei atana tui tak a ni, a zawr duh a, a hmin hma a, Rawtuai quality tha tak a ni bawk. 

RAWMI HRECHIANG TURA CHIN: Mizoramah hian thing leh mau kan tichereu hle tawh a, thing buaipui aiin,  a  hlawk hma zawk tur leh kan chhawr hma tur zawk, mau buaipui mai hi a fing ber. Mizoramah mau dang ching tura buaipui tur pawhin  a chi (seeds) hmuh theih hun a hla lutuk.  A bul kar ngawt dawn ila, a hmunpui (plantation) daih tur kan inkar mai lo vang. Mahni huan enkawl faina hmun ngeia Rawmi chin a fuh hle.

Mizoram mau Rawmi chinna hmun (plantation) siam tur hian a chinna hmun tur  sik leh saah harsatna a awm lo. Ram vawt leh ram lumah a awm thei vek a. tam/lo vah faina hmun leh thlawhbua samfaina hmunah pawh a chin/a phun theih vek. Thil intihre tak tak hovin, ram vawtah leh thingkung bulah emaw, ramngaw karah lo chuan a puitling thei lo, an ti hi chu dawt a ni. Hmunhma fai tluka thil phunna tha dang a awm lo. Rawmi hi rangkachak pawh lo ni teh reng se, a sawichhe pawl chuan an sawichhe tho tho. Zing hma taka thovin, tukverha dak vang vang chungin, “Vawiin chu tu nge ka rel ang aw?” ti mi hi an awm ve tlat. Chuvangin, India ramah, mau nei tha state nih hi a finthlak hle tawh dawn a. Sawrkar laipui atanga a bik taka item mal, item bil bik tana sum rawn thehchhuah theihna a ni bawk. Mi mal tan pawh, Rawmi hmanga raw-tlawn hralh leh Rawmi-tuai hmangin, phun atanga kum 40 chhung tehmeuh thlasik anga khel lova sum hai luh theihna nei turin, Rawmi hi buaipui a, hrechiang tura ngaihven mai hi a fuh hle dawn. Rawmi hi IMCS Agribusiness Project item a ni a, Agribusiness awmzia hrechiang duh leh Rawmi hrechiang duh, finfiah duhte chuan eng hunah pawh  IMCS Nursery Farm Lengte-ah emaw, IMCS Office, Upper Khatla, MG Road, Aizawl hnenah zawhfiah theih reng a ni e. 

Share now