- Engkima Chawngthu

Mizoramah hian eng rawngbawlna hi nge kohhran hrang hrang te huapzo ber a, pawl hrang hrang te kan luanza theihna ber ti ila. Bible Society rawngbawlna tluka rawngbawlna huapzo, pawl leh kohhran hrang hrang kan luanza theihna hi a awm kher in a rinawm loh. Mizoramah hian kohhran pawl tam tak a awm a, a then te chu kohhrana han chhiar em em tham lo thlengin kan awm a. Heng ho hi  thurin  hrang, uar bik leh duh dan, pawm dan in ang lo tak tak pawh kan tam viau reng a ni. Hetiang zat pawl awmah chuan Isua chanchin tha hrilh darh kawng, heng ramthar rawngbawlna kawngah pawh hian  chanchin hril inti si hian beram inruk sak tih te, hmalakna in luh thuah  tih te leh neuh neuh hi kan nei nasa viau  mai a.  Rinna pawm danah pawh Trinity ring rau rau pawh kan thawk ho vek thei lova, trinity ring leh ring lo te phei chu thawh ho ngaihna a awm lo tluk a ni. Kohhran hruaitu anga thawk hona leh Para-church anga thawh hona neih mah ila mipui huap  leh tel ve theihna rawngbawlna a tling hlawm meuh lo ti ila kan sawi sual kher awm love. 

Bible Society ah hian chuan pawl hrang hrang te kan luang za in thurin inang lo, pawm dan leh uar bik in ang lo, trinity ring leh ring lo te pawh kan luang za thei hi a ropui em em a ni. Kohhran zawng zawng hi luang za thei lo mah ila, kohhran lian leh langsar deuh te chu kan luang za in kan thawk ho tha viau a, a lawmawm tak zet zet a ni

He pawlah hian mi inang lo leh chi hrang hrang kal khawm kan ni na in, inelna leh inerna a awm ve vak lova. Pathian chanchin tha hrilh kawngah pawh kan luang za thei  em em a, pawl ram in luh thelh leh beram ruk pawh a lang lova,  Budget khum tam bik a inelna emaw, a thawh thlem bik tih lam a awm ve lova. Kan phak ang te te in phur takin rawng kan bawl mai a, hetiang tak maia rawngbawlna  hi a vang viau in a rinawm a ni.  Kristian pawl hrang hrang kan thawh ho theihna hi vanram nun te pawh min tem lawk tir em aw tih theih a ni. Leiah inthendarh in rin dan leh pawm dan in ang lo  mah ila vanah chuan kan in thendarh tawh dawn lova, lungrual takin kan awm za tawh dawn te han ngaihtuah thlen phei chuan Bible society rawngbawlna tluka van lam rim nam hi a awm kher dawn em ni aw tih theih a ni.  

Mi thenkhat chuan BSI hi kohhran pawn a pawl, kohhran pui tu, kohhran ruala kal ve pawl Para- Church angin an sawi a. Kohhran thenkhat hian Para-Church zingah tel mahse BSI a kohhran te hian an hmalakna  hi kohhran huang chhungah dah  thlap in, kohhran anga hmalak a ni thin a, chuvangin chanchin tha hriltu pawl dang te nen chuan kohhran in ngaihdan pawh a in ang lo  reng a ni. Pawl hrang hrang ten he rawngbawlna hi kan kal pui ho a nih avang hian a sap  tawng takin  Para-Church aiin Inter-church a ni zawk mah em aw tih tur a ni  awm e. Chuvangin, rawngbawlna pawh hi  kan ngaihpawimawh a, thahnem ngai leh zual kan kal pui pawh a ngai hle a ni. 

Tin, Bible Society rawngbawlna hi a mak khawp a, hetiang taka mi tin ban phak rawngbawlna hi a tam lo mai thei e.  Tlema rawngbawlna a inphal deuh te, neinung deuh te tan Patron member atanga tan in, member thenkhat pe tam thei ve lo tan pawh nitin chanchin tha hrilhna kawng hawngin Gospel-A-Day, nitin cheng khat in rawngbawlna a hawng a ni. Nitina cheng khat em pawh phak lo hi chu kan awm kherin  a rinawm loh a ni. Hei hian mi tin min huap zawh zia, mi tin ban phak tura ruahmanna a siam thiam zia a lang chiang viau awm e. Heng bakah hian kan thil neih leh kan tawn ang zela rawngbawl theihna a siam a, a lawmawm tak zet zet a ni.  

Tun hma lama life member te aiin tuna life member nihna lo sang deuh a, mahse heti zawng hian han ngaihtuah  ila, life member nih pawh kan dam chhung a ni mai a, kum tin kan dam tek tek chuan in nitin cheng khat hisap in member kan ni reng thei dawn a, harsa lutuk lovin kan dam chhungin nitin cheng khat lekin rawngbawlin chanchin tha kan lo hril thei reng a lo ni a, a tih chi em em a ni. Tin, Life member emaw Patron member emaw nih tawh tan pawh rawngbawlna  chawlsan mai lovin kum tin in nitin chanchin tha hril in emaw Bible missionary emaw in rawng a bawl zel theih a.  Heng hmang hian rawngbawl zel ila, kum tin kan nih thar zel leh certificate kan dawng thar reng thei bawk dawn a, thil tha tak a ni bawk a ni.  Heng te hlei hlei hian a huap zawh zia a tarlang chiang viau awm e. Chutih rual chuan in BSI lam hote te pawh hian in BSI thawhlawm te hi miten chanchin tha thehdarhna rilru in, ui mahse ui ngam lovin Pathian ram zau nan an thawh ve theihna  a ni tih rilru nen an thawh khawm a ni tih hria in, a hmanna kawngah pawh an fimkhur fo a tul viau awm e.  

Isua’n khawvela a lo kal khan a rawngbawlna chhunzawm turin, a chanchin midang hnen a hrilh ve turin  a zirtir te a ti a. Hei hi a ngaipawimawh em em a, thupek ropui ber an ti hial a nih kha. Chu Isua ngaipawimawh em em  rawngbawlna chu Bible society rawngbawlna hmanga hian midang te hnenah awlsam takin chanchin tha chu kan hril thei a ni. Kan kawtkai mai ah, kan inchhung luma atangin awlsam takin Bible kan chhut  tirin, a lehlin leh thehdarh hna kan thawk thei a. Pathian  rawng kan bawlna remchang hi kan phak ang tawk te te in lo zawm ve ila, Pathian  pawh in kan inpekna hi min chhang letin  tisa leh thlarau lamah nasa leh zual in mal min sawn ngei a rinawm.