Lal Isua hnungzuituten  eng nge kan tum ber?” tiin in zawt ta ila, kan thih hnua Pathian hnena awm a, chatuana a hnena chen a ni. Chu chu vanram kan ti mai thin. Thih hnu piah lama ‘sual khawpui,’ ‘Meidil,’ ‘Hremhmun’-a awm chu Kristiante chuan tuman kan duh lo. Mahse, he khawvel kan kawngzawh mekah hian ringtu piangthar, rawngbawltute zingah pawh hian hriat fuh loh avanga kawng dik zawh lo hi mi tam tak a awm theih thin avangin Pathian thu (Bible) hi uluk leh chik taka kan zir a ngai a ni. Mi tam tak chuan Pathian thu zir chhuakte hi thlarau mi lo riaua hriatna kan nei thin a, an thusawite chu a hul huk angin kan hria a, kan ngaithla thin a ni. Ringtu, rawngbawltuten kan mamawh em em chu   ‘ Theology’  awmzia leh a nihna dik tak hriat hi a ni. Mizoram hi kan vannei em em a, Pathian thu hrilhna kawngah te kan zalen a, Pathian thu pawh kan hre ve riau, kan hriat dan erawh a thuk lem lo va, Bible kan zuk hriat dan kha chik taka zir aiin keimahni hriat fiah dan kha kan kalpui mai thin a ni. Hei hi kan thatpuina lam aiin keimahni ngei pawh Bible hriatna dik loah min hruai a, mi dang pawh a nghawng a, kohhran pawhin a tawrh phah thin a ni. Kan nun min vawnghimtu atana Bible chhiar chhuah kan tih thin pawh a tha lutuk, Bible bung leh chang hre viaute hi lehlamah chuan ‘Theology’ lama zuk hre thuk em em lo mi tam tak a awm theih a ni. A bik takin thuhril rawngbawlna changtute phei chuan Bible hriatna thuk zawkah luhchilh ila, Theology awmzia uluk zawka kan zir a pawimawh hle a ni. Mizorama Pathian thua kan buaina tam zawk hi chu thuhriltu tam zawkin Pathian thu awmzia an man tawk loh vangin kan buai phahna hi a tam em em ti ila kan tisual awm lo ve. Chuvangin, uluk leh chik zawka Bible-a Pathian inpuanna te hi kan zir a ngai hle a ni. Theology hre fiah tak tak tur chuan thui tak ziah a ngai dawn a, phek hnih vel leka han fiah kuar kuar thei a ni lo mai thei. Point  hnih/khat lek tarlang ila, kan mamawhna lam tlem thailan kan tum dawn nia. Bible-a thuziakte hi Pathian inpuanna a ni tih hi kan hre chiang hle tur a ni. Chu chu Theology hmangin zir a ngai ta thin a, hei hi rawngbawltuten kan tui chilh ngei ngei tur a ni. Theology  chik taka zir hi a bik takin rawngbawltuten kan ngaih pawimawh a tha: A bul thum chhui hi a ngai thin, Grik tawng atanga lak chhuah a ni a, ‘Theos’ leh ‘Logia’ atangin a ni. ‘Theos’ chu ‘Pathian’ tihna a ni a, ‘Logia’ chu ngaihtuahna fim tak hmanga thuril chhuina, hrilhfiahna tiin Mizo tawnga lettu Pathian thu thiamte chuan an ziak tlangpui. Bible-a Pathian inpuanna thu zawng zawng hi mihring kaltlanga ziak a ni a, a hunlai boruak mil zelin a ziaktute hian an ziak thin a ni. Kum tam tak a liam tawh a, hrilhfiah ngai leh a hunlai mila chik taka zir a lo ngai tawh thin a ni. Theology  chu Bible-a Pathian inpuanna thute chik tak leh uluk tak zir hi a ni. Theology hi khawvel hmun hrang hranga kan hnam zia mil zel leh kohhranin a hunlai mil zela Bible behchhana a sawi fiahna leh Kristian thurin a lo siamna te pawh a ni. Pathian thu thiam lar tak Owen C.Thomas chuan, “Kristiante thurin, kohhran thurin-te hi awmze nei taka theology hmanga sawi fiahna a ni,” a ti. Bible-a thute hi a hunlaia mila Pathian hnen atanga hriattirna dawn chu ziah chhuah a ni a, hun a lo kal zel a, a lo dawngtu ziah hun laia an hriatthiam ang khan hriatfiah mai a lo har tawh thin, chu chu theology hmanga uluk taka zir a ni thin a, theology hmanga zir tih hi mihring finna ngawta a pawnga puia zir a ni lo va, Pathian thuthiam kan tihte hi Pathian pawl chunga hriatfiahna an dawn ang leh thiamna nena zir chhuah a ni thin a ni. Theology hmangin kohhran thurin tha tak takte hi a lo piang chhuak ta thin a ni. Kristian theology hi kohhran innghahna, thurin a siam chhuahna Kohhran theology a ni. A pawimawh a, kan hlamchhiah thiang lo a ni tawp mai, Bible thute hi uluk tak leh rilru zawng zawnga zir chuan a hlawk a, Pathian pawlna pawh nasa lehzualin miin a chang thin a ni. Pathian ropuizia a hmu zawk thin. Mahni duh dana Pathian thu hrilh fiahna hian kohhran a tichiai a, a tibuai thin a ni: A bik takin kan chenna ram bikte hi han en ila, sawi tur tam tak a awm a ni. Pathian thu hi kan duh em em a, duh viau e ti lo chuan Pathian thu kan hriat dan a pawnlawi viau si a, hei vang tak hian mahni tawka hria inti kan tam phah a, mahni tawka Thlarau Thianghlim chenchilh inti kan tam phah bawk a, a bik taka Pathian atanga thu dawng inti, sawi nghing lawih khawpa nun puak  chhuak kan awm a, chungte chuan an hriat dan leh an hmuh dan kha an han puang chhuak piap piap mai thin a ni. Chu chuan eng nge a nghawng kan tih chuan mahni awmna kohhran duhkhawp lohna a lo lian a, kohhran chhuahsan tih chu an thupui ber a ni ta tlat thin a ni. A pawi em em, kohhran an tibuai a, rawngbawltu an hmu khawro thin a ni. Heng lak atanga him tak leh nghet taka ding tlat tur chuan Pathian thutak kan hriat a ngai a, Piantharna dik kan neih a ngai a, Bible-a Pathian inpuanna te hi chik zawk leh uluk taka kan zir hi kan tihtur zinga pawimawh em em a ni. Theology zir ulukna hian kohhran atanga kal peng tur a dang thei a, kohhran a ti pumkhat bawk a ni. Miin Pathian atanga thu a dawn nazawng a tha lo kan tihna a ni lo va, heng zingah pawh hian Pathian mi hman tha tak tak an awm a, heng thu tak dawngho hi chuan kohhran an tibuai lo tlangpui thin a ni. A chhan chu Pathian thu tak an dawn tlat vang a ni. Pathian thu zir kher lo zingah pawh belhchian dawl tak tak tam tak an awm a, a tlangpuiin hengho nun hi chu mahni theih ang angin Pathian thu hi uluk leh chik takin an lo zir ve thin a, kalsualna laka venghim turin Pathian hnenah bang lovin an tawngtai thin a ni. Bible-a Pathian inpuanna te hi paih tur pakhat mah a awm lo, Mahse, a thu hian eng angin nge min kalpui a tum, a thu thenkhatte hi har tak tak, han lak kawih awlsam takte a lo awm thin a, heng tak hi uluk zawka kan zir ngai lai tak chu a ni. Thuhril rawngbawlna a pawimawh, theology hlutna nen thu a puanchhuah a ngai: Thuriltu dinhmun pawimawhzia leh a hlutna hi kan chhut ngai em?  Thuhriltu dinhmuna ding ve ngawt, mahni koa a lo tlak takah chuan tia kohhran mamawhna pawh zuk chhut hranpa lem lo, mahni rilrua lo lang leh veizawng sawi vak mai te, Bible chang behchhan nei ve tho si a, a mil lo deuha Pathian thu kalpui daihte hi thil awm thei tak a ni a, a pawnga puia a ngaithlatute chawhphur tum ngawt pawh a ni chuang lo, Bible nena thu tak inrem, kohhran miten kan sawtpuina tur kha kan inbuatsaihna-ah hian a lang tur a ni. Bible kan en chuan thuhriltu chu Pathian mi  hman, a duhzawnga nung thin mi a ni a, Pathian nena inpawl  thin mi a ni. Thuthlung Thar lamah chuan Petera thusawite kha a nung em em a, Solomona hulhliapaa thusawite (Tirhkoh 3:12-26), Paula thusawi te, Jakoba thusawite leh mi dang thuhriltu ropui tak tak an awm a ni. Thuthlung hlui hunah kha chuan zawlneiho kha thuchah hrang hrang puang chhuaktute an ni. Ram dinhmun a fel loh chuan zawlneiten an puang chhuak thin. Simna thu Pathianin a mite hnena puanchhuah a duh chuan zawlnei kaltlangin a ti mai thin a ni. Chuvangin, thuhril rawngbawl hna hi Pathian thu ken puang chhuaktute an ni a, a pawimawh a, thuhriltu chuan Pathian tih tak zetin a pawl thin tur a ni. Lalpa hmaah a kun tam loh chuan mahni mihring inbuatsaihna ringawt hi chu a tawk zo lo, thuhriltu chuan a inbuatsaihnaah Pathian rawn chungin Bible uluk takin a zir ngei ngei tur a ni. Tichuan, a thu puan chhuahnaah Pathian a tel chuan ngaithlatute thinlung a hneh dawn a ni. Kan ram ngeiah pawh kohhran rawngbawltute kan ruat danah hian fimkhur taka kalpui a tha hle a ni. Fimkhur tak han tih chuan tute pawhin, “Fimkhur takin, Pathian rawn chungin kan ruat,” chu an ti ngei  ang, a dik tho; mahse, thenkhatah hi chuan rawngbawltu nuna nung lo, thuriltu dinhmuna ding em tur em ni? tih tur chi hi a awm ve nual niin a lang. A pawi em emna chu rawngbawltute nun uluk takin miin an lo thlir thin a, zir tur an lo zawng thin a ni. Sawisel bo chu an ni bik hauh lo, fimkhur erawh a ngai a ni. Mi pakhatin a sawi ka hre reng a, kan venga puitling zirtirtu chu, “Card a deng ka hmu thin a, a mak ka ti, puitling zirtirtu chu kan lo hmu sang lutuk a, ka lo zah thin, ka en dan a dang vek,” tiin a sawi. Chutiang bawkin thuhriltu dinhmuna ding, pawn lam nun uluk loh avanga miten an hmuh dan tha lo tak hi sawi a awm thin a ni. Kan insawi thiamna tha lo tak lo lang thin fo chu “Tumah tha famkim an awm lo, insawisel tur a ni lo,” tih hi a ni. He tawngkam hi chu chhuanlam a tling lo a ni. Felfam kim kan awm lo tih chu tute pawhin kan hre vek a ni. Khawvela kan awm chhung chuan ringtute hi sualin min bei reng a, kan tlu a, kan pe tek nawk nawk a, kan rum thin a ni. He lam chak lohna hi chu a hriat khawp mai. Rilru fim kur, rawngbawlna chelh ve duh riau, hotute be tlawn thiam riau, sum leh pai neih hmang thiam riau. Sum leh pai lakluhna felhlel pawh nise, hmang thiam riau avanga rawngbawlna chanvo pek mai maite hi a pawi thin a ni. Hengho hmaizah avanga ruatte hian Pathian thu tak an zir peih lo mai thei, piantharna tak tak pawh an nei lo mai thei, an tawngtai tam lo mai thei. Eng pawh nise, he thupuiin a ken pawimawh tak erawh chu Pathian thu tak zir peih a, theology hmanga rawngbawlna hi chik takin i kalpui hram hrang ang u khai. Tichuan, keimahni pawh kan hlim ang, Pathian ropuizia pawh kan hmu zual telh telh dawn a ni.