Aizawl: Rural Development Minister Lalruatkima chuan Zirtawp zan dar 6 khan Durtlanga State Institute of Rural Development & Panchayati Raj (SIRD & PR) hmun a tlawh a, Mizoram chhung District hrang hranga SIRD hnuaia faculty-te leh SIRD Durtlang a thawkte infuih tharna hun a hmanpui.
SIRD Conference hall-a inkhawm buatsaih hi Khuangthansanga Pakhuangte, Senior Core Faculty in a kaihruai a, SIRD Director Maria CT Zuali’n inlawmna leh inhmel hriat tirna hun a hmang. SIRD Director chuan Minister viak tha leh principle nei tha tak, politics lam zawng chauha thil thlir lo mi RD Department-in an nei chu vanneihna leh malsawmna a nihzia a sawi.
RD Minister Lalruatkima chuan Mizoram thingtlang lam leh khawsak harsa zawkte tan SIRD hnathawh a tangkai zia leh ram hmasawnna atan thingtlang tih hmasawn a pawimawhzia a sawi a. Hemi kawngah hian SIRD hnathawh dan tha a tih thu leh hei aia nasa zawka tan la turin kalkhawmte a chah a. “Mihring chu inzir reng tur kan ni a, hmasawn tura kan mipui tam zawk zir tir a, nunphung tam tak thlak thleng thei tu pawimawh tak chu he SIRD hi a ni a. SIRD hi thingtlang hmasawnna kawngah a sulsutu pawimawh tak in ni a, neitu thinlung puin hnathawk turin ka ngen che u a. Mi thiam rual awmkhawm innih angin Pathian leh he ram tan i thiamna te nasa lehzuala hmang turin ka ngen che u a ni,” a ti.
&&&&&