Aizawl July 3, 2024 : Vawiin khan MNF Legislature Party (MLP) chuan Leader of Opposition Lalchhandama Ralte hovin Hlimen-a khawtlang tangrualin relief camp an sak mek an tlawh a, Relief Camp hotu ten Pawisa an hmuh ran theih nan thehtawp lo chhuahpui turin an lo chah.

He hunah hian Hlimen Relief Camp hotute chuan MLP-te hi lo dawngsawngin, Relief Camp pahnih sakzawh tawhah In pahnihah hian chhungkaw 20 an riak lut tawh tih an sawi a. Relief camp-a awm duh camp la sak loh avanga awmna la nei lo chhungkaw 21 an la awm thu an sawi a. Sorkar atangin cheng khatmah relief camp sak nan an la dawn loh thu sawiin, an dawn ngei an beisei thu an sawi a. An veng dawrah nuai 20 chuang man a ba thlauin In sakna hmanrua an la tawh tih an sawi a. "Pawisa kan hmuh ran theih nan theih tawp min lo chhuah pui rawh u," tiin Relief Camp hotute hian MLP-te hi an lo ngen a ni.

Relief Camp hotute hian zawhna chhangin Disaster Management & Rehabilitation Minister-in an camp a la tlawh loh thu an sawi a. An bialtu MLA atangin camp sakna tur fund an dawn loh thu an sawi bawk.

He hunah hian Leader of Opposition Lalchhandama Ralte chuan thusawiin, "Sawrkar-in Hlimen Relief Camp sakna atan tun thlenga cheng khat pawh a la pe lo hi a lungchhiatthlak kan ti hle a. Khawtlang tangrualin nuai 20 chuang an seng tawh chunga sawrkar a la ngawi thei hi a mak kan ti hle a ni," a ti. "Central sawrkar-in chhiat tawkte chhawmdawlna tura India ram State-te min pek sum hi, hreng khawtlai lo leh pawtpeng lovin pe chhuak zung zung turin sawrkar hi kan ngen a ni," a ti.

Chhantea chuan, "Nimin maiah Zemabawk lamah pawh vanduaithlak takin chhiatna a thleng a. Kha vanduaina thleng tuartute chhungte pawh kha installment lovin, a full-in tuamhlawmna leh ralna sawrkarin pe rang se kan duh a ni," a ti.

Leader of Opposition chuan, "Chief Minister-in phur takin Cyclone Remal avanga chhiat tawkte tuamhlawmna tur vaibelchhe 15 ruahman a nih thu a sawi hnu thla khat a chuang tawh a. Heti chunga relief camp sakna pawh sum an la pechhuak thei lo hi a mak hle a. Chhiatna tuartute an lainatawm tak zet a ni," a ti a. "Thil ṭha ti tura sawrkar nawr leh puih kawngah theih tawp kan chhuah zel dawn a ni," a ti bawk.

MLP aiawhin Relief Camp tanpuina Rs 20000/- chu RM Chakma MLA-in a hlan a, he hunah hian Robert Romawia Royte MLA, Lalrinsanga Ralte MLA leh MNF hruaitute an tel a ni.