Hnam Zangruh YLA : 

English Mizoram awptu te hi administrative training chhuak, fing tak tak ICS an ni tlangpui a. Heng Administrative officer ho hian ram an lo lak tawh - tawnhriat (African leh Red Indian, Far East leh Pacific Ocean etc. thleng ram Colonial administrative experiance) nei an ni tlangpui a. Chungho chuan Missionary pawl hrang hrang rawn chhuah tur hi an hre lawk vek a ni. Chung chuan ILP danin a khap sakhaw zirtirna chi hrang hrang a rawn ken tur kha an hre lawk vek bawk a. NE Parry (ICS) chuan Missionary lo chhuak an han tam takah zirtirna chi hrang hrang Martar ngam vek chuan Mizo Nun chu a hawlh darh tan ta tih a han hmuh chuan, an hnam dan leh nihna boral mai tur chu a vei ta em em a, Lal tam tak (56 lai) leh upa ko khawmin Hnam dan (Culture Custom, Tradition) a râwn kual fe hnuah a ziak ta a.     ‘Lushai Custom and Ceremonies” tiin Dt. 19 Sept. 1927-ah a ziak zo a ni. Tlawmngaihna Mizo dan thatzia te Mizo values a ziak nasa hle a. Mizo ze tha an inzirtirna hmun Zawlbuk chu NE Parry chuan Mizo Hnam dan zirna sikul funkim bertu a ni tih hriain a boral / hluihlawn mai chu duh lovin a sak thattir leh ta a. Mahse ringthar nunah Mizote an tlan tan mek tawh si a. Chhunzawm that theih tak tak a ni ta lo va. NE Parry chuan a hnunga lo kal Anthony Gilchrist Mc Call-a (ICS) chu a charge hlan pahin, a duh dan a rochun a. Mizo Hnam dan a ziah te pawh chu a pe a. Zawlbuk chhunzawma tundin leh tumnain hma a sawn that tak si loh bakah Mizote nun khua leh tih dan thlakthlengin Culture leh tih dan a danglam chak tak lutukah chuan Missionary-te inthiam lo bawk si nen, Superintendent chuan Mizo hnam zangruh tur pawl din chu a rawtpui ta a. 

Rev. David Edward-a (Zoremi pa) convener-ah dahin, Mc Call chuan phalna a pek angin Young Lushai Association (YLA) ‘Hnam kungpui tur din a lo ni ta a. “Sakhua leh Political party a in rawlh tur a ni lo” a ti a ni. He pawl hi Mizo custom and tradition khaidingtu tur a nih avangin Sakhua leh Politics a inrawlh a rem lo va. Mizo zawng zawng lenna tur culture kungpui a ni a. A tir lam phei khan chuan an han la fir mai mai khawp a. Lushai Superintendent Hnuhnung ber LL Peters-an Ram chungchang ngaihtuah tura ni 14 Aug. 1947-a vantlang inkhawm Theater Hall (Vanapa Hall awm hma thing In)-ah a koh tum pawhin politics chungchang a nih avangin YMA chu an tel lo tlat a. Tunlai chuan Mizo hmakhua turah chuan YMA chu a lang vat thin a nih tak zawk hi. 

Lal (Chief ) Ep rawnna : 

Khawvel ram tam takah hian Lal Rorelna (Anarchy) hi Mihring ro inrel dan upa ber a ni a. Mizote pawhin chu rorelna chu kum 200 vel chu kan lo hmang tawh a. Rorel dan tawnhriat pawh an ngah tawh hle a ni. Lalber han nih chuan ngaihtuahna hman a ngaih nasatzia chu Lal ngai lo chuan an hre lo. Mizo Lalten “Ni leh thla kara leng” an in ti a. Hei hian thil thuk tak a keng a ni. Chutiang khawpa Lal lalna sang chu a aia chak leh sum leh pai ngah zawk, bungraw nalh zawk, kawr mawi zawk, leh ralthuam tha zawk ten an rawn tuk tlawm ta si a. Mizo Lalte leh mipui inkar tizau turin, a ek pheltu Missionary (Mi thlavang hauh hrat) te pawh an lo chhuak ve ta nghal bawk si a. eg. Missionary hnimhnai ten Secondhand Suit var an hlawh thin a. Inchhung bungraw thenkhat - pheikhawk, laltin, khawnvar, bungbel etc. an hlawh. 

Missionary-ten mipui ngaihsan an nih theih nan chi (Salt) lei phalna (permit) control an dil nghe nghe kha, kan hre vek ang.  Chi lei phalna pe theitu Missionary te chu Mizo mipuite chuan an han ngaisang ta a. Tiang chuan Missionary te hian Missiology training chhuak an nih si loh chuan, nasa takin hma an la bawrh bawrh mai a. Mizo Lalte chu a hmingin rorelna pe mah se, a mipuiten zualkona leh tlan tauhna  tur an neih tlat avangin an hlau tawh lo. Khawtlanga mi rethei daikilkara mi kha Kristianah inpein, ringthar a lo ni a. Missionary âwm a ngheng ta a ni.

Missionary leh Bawrhsap Lalber chu Sap an ni ve ve si a.  Lal (Chief) chuan mipui te lak atangin hnam dana an lo tih thin “Fathang” “Sachhiah” te a la thin a. Sapho Lushai Hills a lo lut chuan, Kuli hnatlang an ko sek mai a. Lal hnenah “I khua atangin Kuli chuti zat rawn tir rawh” ti in (Paruana) kohna a tam em em mai bawk a. Hei hi Mipuiten an ning a, a bulthum hre si lovin an Lal kha an mawh chhiat daih mai a.  Hetianga Lal, thuneihna nei lo a ding hi Khasi Lalpa U Tirod Singh chuan “Lal chu mualpho taka a dam ai chuan, chu a mualphona chu thih chilh mai a tha zawk ang” a ti tawp mai a ni.. 

Chutianga Missionary-ten mi hnuaihnung/mimir, rawn beltute Kristiana an siamte chuan an Lal an hlau tawh lo va.  Lalin hrem dawn se Missionary-te an hnungah an lo ding bawk si a. Mizo Chief-ho chuan Kristian kha an huat phah ta a. Lal leh Khawnbawl upaten Pasaltha an chawimawina Zu Nopui chu, Missionary-te chuan, sual, Setana thiltih tiin Mizo mipui an zirtir a. Lal tam tak Kristian hua, duh lo an rawn awm chho ta a.  Lal te leh Mission thil tih chu a indo ta a. (Shakespears letter en la) Missionary-ten Lalho an mil tak loh avangin insakhithingchunglawn a tam ta. Lal rorelna chawhmeh Zu(wine) chu an sawi chhiatsak ta a ni. Vawiin thleng hian society-ah suakbakna a siam ta a nih hi. Heng thil hian India Independent era-ah thil hriat sual (wrong notion) neiin Mizoten kan tana tha ber tur kan thlan sual phah ta niin a lang. Heng kan sawi tak zawng zawng hi a bu chhungah document nen chipchiar zawkin ziah a ni e. 

Engpawh nise kawng kan zawh sual tak rau rauah chuan ring tikhawnga huang tauva, zalenna neia, duh dana kal thei kan ni ta lo. India a hausak leh sumdawnnaah lungawi lohna kan hmu hnem ting mai dawn a ni. Independent kar In-surrender kan ni a. Kan rilru sukthlek pawh 1966 vel nen chuan inthlau tak a ni tawh a. Ram hma ngai, Politician dik tak (Tualchher politician ni lo) Ram tana Martar ngam mi kan thlan chhuah a. Ram Economy siama kan hausak hunah kan rilru put hmang (Pride) kha kan nei let leh ang a. tanpui ngai lova kan kutkea kan din hunah, kan kal sualna HNAM hmakhua  Ramri te pawh siam a ngai tawh a ni. Economics-a kan san loh chuan kutdawh atang chuan thil siam that a har a ni. Mipuiten rilru dik kan put a ngai a ni. 

Ram chungchanga R. Vanlawma thu ziak hi en leh lawk ang : “London Parliament-in The Indian Independence Act 1947, September thlaa a han pass pawh khan Chapter 30, 7 (c)- ah chuan Lushai Hills chu Independent ni turin a pass ta a. Reife kan sawi hnu chuan Mac Donald-a chuan “Independent ringawt chu in hmu ta a. Mahsela kan chhuah hnu hian India chuan Sipai chaknain a hneh lak leh mai thei che u a. A sawt vak lo mai thei a. Amaherawhchu, keini Scotland ram leh England kan inzawm dan anga duh thua mahnia indang leh thei tura kan tih ang Scottish Pattern hi an pawm thei a nih chuan a tha ber ang.” a ti a. 

Chutiang chu tha kan ti ta a.  Kan hotute pawh chuan an lo remti a. A tukah chuan kei pawh ka liam thla ve leh ta a, Assam-in Pakistan zawm lo tura chhan turin India kan zawm ang a, eng hunah pawh kan duh hun hunah Independent ni leh mai turin thu kan zuk thlung ta a. Kan hlim haw viau mai,” tiin. Heng lai an rilru lang ta chu McDonald-a’n India-in an lem mai theih tur Mipui pawl Interim sawrkar siampui hman a tum hi a rawn sawi lang a. Tin, Mizo tualchher politician-ten an duh thua India zawma an duh thua chhuahsan leh mai theih an inring a. Mac Donald-a tum ram hi lo kalh lo se Boundary thlengin engkim a fel ang tih hi thlir dan pakhat a ni tih ka sawi hmasa a ni.