Aizawl 26 : Nimin khan India ram hmun hrang hrangah India Republic Day vawi 70 na chu ropui taka lawm a ni a, India hmarchhak state thenkhatah erawh Citizenship (Amendment) Bill (CAB) 2016 avangin mumal taka hman a ni lo a, Mizoramah pawh Aizawl-ah bak lawmna hun hi hman a ni lo a, NGO ten Republic Day hi an boycott avangin official tlem azawnga leh venhimna lam thawktute bakah politician tlem a zawng bak a lawmna AR Lammual-ah kalkhawm an awm lo a. Parade contingent 30 turah NGO?te ngenna avangin inhnukdawk an awm nual a, Armed contingent paruk leh Band (Pipe & Brass) contingent pathum chauh an in lan a ni.

Chief Minister Zoramthanga leh Joint NGO hruaitute thukhawm rel angin Aizawl-a Republic Day kal tur bithliah te chu an kal a, Mizoram hmun dangah erawh lawm a ni lo bawk.

Aizawl-ah chuan Joint NGO hmalakna-in AR Lammual luh theihna gate tinah duty indah a ni a, heng mipui pungkhawm te hian CAB duh lohna thuziak te an keng hlawm a, sorkar lamin kal tura an bithliah chin bak chu a lawmna hunah hian an tel lo a. He hunah hian sorkar hna thawk zingah Mizoram sorkar hnuaia Secretary chin chunglam, Superintendent of Police (SP) chin chung lam leh MLA chin chunglam chauh lawmnaah hian an tel a ni. Lawmman hrang hrang dawng turte chu ngaihhnathiam an ni bawk.
Nimin zinga Zodin square-a Jt. NGO duty kalkhawm te hmaah hian YMA President Vanlalruata chuan, Lok Sabha-in CAB an pass mai khan a tih thawn thu a sawi. Boycott tuma hmalak a lo ni tawh avangin sorkar nen inremna siam tawh mah se, he thil hi kaltlangpui a nih thu pawh sawiin, “A hming lekin kan lo ti ve ang e, kan ti a, inhriatthiam tawnna anga boruak a awm lo a nih chuan a tul anga hmalak a ni ang,” tiin, “Boruak tha, hnam inlungrualna tha tak, kan hmu zel hi a lawmawm a ni,” a ti zui bawk. Lammual-ah hian luh luih tum ang chi an awm lo a, Mizoram-a sorkar hnathawk hnam dang luh tum te pawh tha taka thu hrilh hnuah an haw ve leh mai bawk.

Assam Rifles school naupang leh zirtirtu thenkhat te chu sikul kai tur emaw tiin Lammual-ah hian luhtir an ni hman a; mahse, a lawmna huna tel tum an ni tih hriat an nih hnuah he hmun hi chhuahsan tir an ni. Lammual thutna tam zawkah mipui thu hmuh tur an awm lo a bawk a ni.

Mizoram Volleyball Association chuan Republic Day puala Volleyball tournament an buatsaih ‘Republic Day Celebration Volleyball tournament’ chu CAB avangin ‘MVA Under-18 Volleyball tournament’ tiin an thlak phah bawk.