Chawhchawrawi

Retheihna ngam loh Ngannou

Admin - Mar 28, 2021

Tawrhna piah lama tumruhna

UFC 260-a March 28, 2021 a Apex, Las Vegas-a intum, main event-ah a a tum hnih nana an inhmachhawn naah heavyweight huangah Francis Ngannou chuan Stipe Miocic a kawnghren chhuhsak ngei a tum a, an inkhel piah lamah he dinhmun thleng tura Francis Ngannou-a'n tawrhna a hmachhawn nasa zia leh a tum ruh zia hi ngaihnawm a tling.

Intawn hmasak kha

2018, January thla khan palian fighter tha pahnih hi anlo intum tawh a. Heavyweight huanga roreltu leh fighter tha ber pawl Stipe Miocic-a kawnghren hren lai chhuh tumin Ngannou a thawk chhuak, mahse a hlawh tling lo. Miocic hian a kawnghren hi tum thum lai humhim tawhin, hum rei thei ber record a siam a ni.

An intawn hmasak atang hian Ngannou chuan thil tam tak a zir chhuah thu a sawi a. Kan intum hmasak ka enlet a, ka fight dan kha ka hrethiam thei lo a ni, ka theihna leh thiamna ka hmang chhuak lo, keimah ka ni lo. Mahse kha fight khan nasa takin hriatthiamna leh tawnhriat neih kawngah min pui thung a ni. Tun tum kan insualah hi chuan thil a danglam tawh ngei ngei ang,” tiin Ngannou chuan an intum hmasak chungchang a sawi.

Tunge Ngannou chu
Ngannou hi Cameroon rama chhungkaw khawsak harsa tak atanga chawr chhuak a ni a. Kum 6 mi lek a nihin a nu leh pa an inthen a, hei vang hian a nutei bulah a khawsa. Kum 10 a nihin quarry-ah hnahram a thawk tan.  Kum 22 a nihin boxing a zir ve tana, mahse kum 1 hnu lekah damlohna vangin a chawlhsan leh. kum 26 a nihin a zir chhunzawm a, tunah kum 34 a ni. 

UFC chanchina hnekna ber pawla sawi Ngannou ‘The Predator’ hi 6ft 4in a sang niin kg 119 zeta rit ani bawk.  UFC 260-ah hian a chak a nih chuan African zinga UFC heavyweight champion hmasa ber ni ang. MMA-ah hian fight 18 nei tawhin tum 15 a chak tawh a, heng zinga 11 hi KO veka a hneh an ni. 

A naupan laia lehkhabu leh pen a neih ve loh vanga zirtirtu leh a pawlpuite hmusit thin chuan,"African zinga heavyweight champion hmasa ber nih ka tum a, tumna a awm chuan eng pawh hi a tih theih ani tih lantir ka duh a ni,” a ti.
Ngannou zin kawng hautak chu

A hmahun thlirin suangtuahna a nei a, a thahrui neih dan a hria a,  a huaisen tih a hre bawk.  Rethei reng renga  hringnun hman liam ngawt a tum hauh lo. Nun nuam zawka nung tur leh a suangtuahna a tak rama a chantir turin an ram chu a chhuahsan ngei ngaiin a hria. 

A talent hai chhuak turin engpawh a huam a ngai, tichuan a idol Mike Tyson hniakhnung zui turin a ram chu a chhuahsan ta rawih mai a ni.

A beisei tihlawhtling turin Ngannou hian a ram a chhuahsan a ni mai lova, a hmu leh angem tih pawh hriat lovin a chhungkua zawng zawng a kal san. Mite angin passport leh visa a nei ve lova, thlawhna leh motor thaa chuanna tur a nei hek lo. Ke leh lirthei rem remah bet lawrin a zinkawng chu harsatna tinreng nen a zawh tan a. Europe rama lut turin phalna a nei lova, a beiseina neih chhun chu vengtute leh thuneitute hmuh lova luh ruk a ni deuh tawp mai. 

A zinkawng chungchang amah ngeiin hetiang hian a sawi,"Ka tum ram thleng turin khawpui hrang hrang leh ram tam tak ka kal tlang a ni. Cameroon atanga Morocco ka pan a, dan phal loh a mi ram luh tum ka nih avangin, man pumpelh nan ka bihruk a ngai fo thin. Zinkawng  harsa tak chu a ni. Mahse, khatih hunlai khan ka vawiin hun tur hi ka mitthlaa, chu chuan min puiin min tichak thar fo thin a ni,” a ti.  

Tum hlen tur chuan tawrh a ngai thin
Ngannou chuan,"Kan ram Cameroon ka chhuahsan hmasak ber tum kha ka nuna ka thil hmachhawn hautak leh harsa ber a ni.  Khawi lama kal tur nge tih pawh hre lovin ka chhuak a, ka kalna chin lah ka hre hek lo. Ka hmu leh dawn em tih pawh hre lovin ka hma hun tur thlir chungin ka chhungte ka chhuahsan a ngai a, a harsa hle mai,” a ti.  

Morocco-ah hun engemaw chen a cham a, chuta tang chuan a tum ram France chu a thleng thei ta hram a. In leh lo riahna tur nei lo. Chuti chung chuan, a nun a thlamuan tlat thu sawiin,“Ka dinhmun chu awhawm lo hle mah se, kha tianga hlimna kha ka nunah ka la tawng ngai lo,” a ti  hial a. "Nun zalen nei tur hian hun tam ka hmang ral, France ram chu hun nuam leh sum thawhchhuahna theihna remchang a ni a, chu chuan phurna leh thathona nasa tak min neih belh tir a, beiseina sang tak nen hma hun ka thlir thei ta a ni. Ka mang ram min thlen turin kawng dik ka zawh tan ni berin ka inhria,” a ti.  Tunah chuan French khua leh tui nihna a nei tawh.