ZALEN, Jan. 03, 2025: Ammie Lalnunpuii ziah, ‘Fa Enkawl Dan Formula 3-2-1’ chu Thawhlehni khan Engineer-in-Chief, PWD Conference Hall-ah Rev. Vanlalbela’n a tlangzarh.

Dr. Mary Lalengkimi kaihhruai lehkhabu tlangzarh inkhawmah hian Rev. Dr. Joe Laldinpuia’n lehkhabu thlirlawkna hun hmangin Dr. Lalbiakmawia Ngente-in Pathian hnenah a hlan a. Upa Lalnunpuia Hrahsel-in thu a sawi. 

Formula 3-2-1 hi nausen pian tirh atanga chhun leh zan hriat hran tulna, naupang than chhoh dan, naupangte leh social media, fate hming phuah chhan nunpui tura zirtirna inkawhhmuhna leh nu leh pate soft lo tura infuihna, Kristiante hunpui awmzia naupangte hnena inhrilhfiahna leh a dangte tar lan a ni.

‘Tihdam aiin inven that’ tih chu a ziaktu thuken laimu niin naupang enkawl turte tana tangkai tak tura ngaih a ni.

A ziaktu, Ammie Lalnunpuii hi Forensic Science Laboratory-ah assistant director niin naupang rawngbawlna lama kohhran pawhin a hman a ni a. NexGen Organisation Founding board member niin, Haggai Mizoram treasurer a ni mek bawk.

Lehkhabu hi milem eng emaw zat awmna, phek 155-a chhah, Rs. 200 man niin Lehkhabuk, FIT Lehkhabu Dawr leh OM Books-ah te lei theih a ni.