Aizawl: Local Administrative Department-in Zemabawk pelha Riangvai thlanumual an hman thin chu plastic paihna atan hman tum a ni.

AMC hotute hnen atanga Zalen thudawn danin August 1, 2019 atangin Aizawlah plastic hman khap a ni dawn a, hei hian plastic zawng zawng huam lovin tunlaia kan hmanlar polythene bag ang chi, micron 50 hnuai lamte chu khap a ni dawn a ni. Plastic khapna hmahruai atan hian AMC chuan June 7, 2019 (Zirtawpni) hian Aizawl khawpui ah ‘plastic chharfai hnatlang’ liantham tak buatsaih a tum a. Hnatlangah hian Local Council, Department hrang hrang leh zirna in te chu thawkchhuak tura beisei a ni.

Aizawl Municipal Corporation (AMC) Commissioner Dr. H. Lalthlangliana chuan, “Plastic hman khap tih hian plastic zawng zawng hman loh tawp lam a kawk lova, a tum ber chu hman tlem a ni. Plastic te hi kan hmanlai chuan a hnawk lemlo a, mahse kan hman zawh hian a hnawk bakah a tawih theih loh avangin a buaithlak ta a ni,” a ti. AMC zirchianna atanga a lan danin polythene bag hi pavalai lam ni lovin nu leh naupang lamah an hmang uar zawk tih hmuhchhuah a ni.

AMC-in Aizawl khawpuia platic product khap a tumna dan hi May 29, 2019 hian AMC Board of Councillors meeting chuan pass a tum dawn a, pass hnuah sawrkar pawmpuina lak leh a ngai dawn a. August thla hmaa dan hi peih hman a nih loh pawhin ‘AMC by law’ hmanga khap tum a ni.

Ruahman dan chuan plastic te hi a paih-na hmun tura ruat-ah hian paihkhawm a ni ang a, hei hi company leh a mamawhte hnen-ah hralh leh a ni ang. Company thenkhat chuan plastic lei an duh thu AMC hi an hriattir tawh nia thudawn a ni.