Nikum All England Club-a inelna lian khelh a nih lai khan Marketa Vondrousova-i hi a entu (fan) zinga pakhat mai a ni a, kuminah erawh hmeichhe maltan champion a ni ta.

Kumin Wimbledon-ah hian Vondrousova-i hi rin kai (seed) a ni phak lo va; mahse, a champion-na kawngah hian rin kai panga zet hnehin rin kai lo a champion a ta hlauh a ni.

Inrinni zana Centre Court-a final khelhah Ons Jabeur chu 6-4 6-4 in a hneh a. 2022 runner-up Tunisian nula hian African leh Arab hmeichhe zinga Grand Slam maltana champion thei hmasa ber ni turin a nghah leh hret a ngaih phah dawn ta a ni.

World ranking-a No. 42-na daih ni mek, kum 24 mi, Vondrousova-i hian thla ruk liam ta chhung zawng kha a banrek na avangin khelmual a lut hleithei lo va, a elpuiten nasa taka tlansanin a dinhmun pawh a hniam phah ta duai a ni.

Czech nula hi final-ah pawh hian rinkai lo zawk a ni a. Grand Slam-a vawi hnih final lo lut tawh, sixth seed Jabeur-i hi ngam lo zawk tura dah a ni a; mahse, Tunisian hi major final a luh vawi thumnaah pawh a chak lo zawkah tangin nomawi a la ban phak lo ta rih a ni.

Vondrousova-i hi nikuma Wimbledon khelh lai kha a banrek tihnat zai a nih lai a ni a, a hmuna entu langsar tak pakhat a ni ve ringawt a, kumina a thawnthu erawh a danglam ta hle.

“Engnge thleng pawh hi ka hre lo, hun danglam lutuk a ni,” tiin a kuta champion nomawi, Venus Rosewater Dish an tih keng chungin a sawi.

Champion-ten an tih fo angin Vondrousova-i hian a chak hnuah players’ box panin a team leh a chhungte, a pasal, Stepan-a pawh a kuah a. A pasal hi final a khel en tur bika London pan a ni a, a hma zawng kha chuan Prague-a an chenna inah an zawhte enkawlin a lo awm a ni.

Vondrousova-i hi rinkai ni phak lo zinga Wimbledon-a champion ni thei hmasa ber a ni ta bawk a ni.

(‘Seed’ hi sports-ah hian ‘rin kai’ tihna a ni chiah lo va, an sulhnu ena thleng sang thei tura beiseiawm team/mi mal hma taka an intum zung zung loh nana an thenna a ni zawk a; mahse, an thlen san dan tura rin dan indawta nihna pek thin tho a nih avangin ‘rin kai’ tiin inthlahrung takin kan dah a ni).