Rinawmna

Admin - Jun 06, 2021

Lalchhandama Colney-

Kan thupui han sawiho tura ka tih hi a huphurhawm ang reng hlein ka hria, tlema ril zawk deuhten emaw han ti zawk sela a ngaihnawm zawk thei ngei ang le. Rinawmna  hi chi hrang hrang awm vein ka hria-mihring, a pathian laka rinawmna, nupa inkara rinawmna, thian inkara rinawmna, ui a pu laka rinawmna. Mihring Pathian laka a rinawm chuan a duh zawng chauh a ti thin a, a duh loh zawng a do ve bawk thin. Nupa inkarah pawh hian mi dang a melh a rem tawh lo va, a hrehawm leh nuamah pawh a tan chauha inhmang tawh tur a ni. Mizote chu thian chhan thih ngam kan ni a, chuvang chuan thiante hi kan vuan nghet hle thin. An thusawi tam tak hi chhungte sawi ai pawn kan pawm zawk thin a, eng thu-ah pawh kan thurualpui zel thin. Ui hi kan sawi lang ve a, a chhan chu ran zinga mihringte thian tha ber an nih vang a ni. Ui pawh hian a pu thu chu a theih ang angin a zawm zel thin, a tul phei chuan thih thleng rakin a zawm thin. Sawi tur dangte pawh a la awm nual ang a; mahse, duhtawk rih mai ila. Rinawmna chungchang a theih ang angin i’n lo ngaithla chhunzawm zel dawn teh ang.

Ni tin hna theuhvah: Lo neiha eizawng kan tam ber a, a dawtah sawrkar hnathawkte kan ni mai awm e a. Lo neitu pawn a huan thlai enkawl nan chemical leh hlo tûr ang chite a hmang thin a; mahse, mi thiamte tih dan ang chiah chiah a a hman loh chuan thil pawi thei tak a ni a, a eitu tur mipuite laka rinawm lohna a ni.

    Tunlaiah chuan organic farming hi a lar tawh hle a, kan tih ve theih chuan thil tha tak a ni a, a eitu tur mipuite tan duhthusam a ni. Office-a thawkte, tan hun dar 9  a ni a, bân hun dar 5 a ni, tlai deuha ka thlen thin chuan emaw, bân hun hmaa ka haw thin emaw chuan ka ti dik lo a ni, rinawm lohna a ni.

    Ka hlawh bak pawisa ka la emaw dawng ve fo thin a nih chuan ei rukna chi khat a ni a,rinawmlo ka ni. Contractor-te leh supplier-hote hlep hnem kan tum lutuk tur a ni lo, kan hna a tha tawkin kan thil supply-te a tha tawk tur a ni, a nih loh chuan mi rinawm lo kan ni.

    Sumdawng leh dawrkaite min dawrtute lakah kan rinawm tur a ni. A mante to uchuakin ni lo se; tin, sawrkar phal loh thilte pawh ti ru lo ila, kan thil zawrhte pawh a man hu zelin a tha tawk tur a ni.

Ram hruaitute: Eptu lam pawh han tel ve nghal se, kan campaign laia kan auhlate kan tihlawhtling hlawm em, nih loh chuan mipui kan bum, rinawm lo kan ni. Kan policy leh manifesto-te engtin nge kan siam aw, vote hmuhna tur ringawt atana kan ti a nih chuan a dik lo hle ang. Mahni party mi leh sa ringawt kan hria a nih chuan a huap kim lo va, chuvang chuan ram hruaitu tak tak ka ni meuh em aw, tih inngaihtuah ila a tha ang. Ka chhung khat lainate ka vulh chiam chiam a nih chuan a fuh ber lo vang, ram hruaitu tha tih tur a nih loh hmel.

    A nih loh pawn ka hlawh bakah sum hmuhna tur dang ka insiam ve a nih chuan a dik lo hle, ei rukna chi khat a ni a, mi rinawm lo hna a ni. A theih chuan kan hamthatna dawn thenkhatte han pe let thei ila; tichuan, ram hruaitu dik tak ka ni tih a tilang chiang leh zual dawn a ni.

    Ram hruaitu hi chuan chân huamin a thawk tur a ni a, a tul phei chuan a nunna hial pawh a hlan tur a ni. Chuti ni lova sum hmuh nan  emaw, ei zawn nan emaw ang reng deuha kan hmang a nih chuan kan hre fuh lo, mi tha lo, rinawm lo kan ni.

Engtin nge kan tih ang?: Rinawm leh rinawm lote dinhmun hi a inthlau hle a; tichuan, keini pawh engtin nge kan rinawm ve theih ang le?

    Bible-a Josefa chanchin kan hria ang a, a pu nupuiin a thlem a; mahse, tuma hriat leh hmuh tawh loh tur pawh nise a ruka hmutu Pathian lakah chuan a rinawm tlat a, hnehna chu a puang thei ta a ni. Josefa hi a naupan tet atanga Pathian thuawih, lo thanglian zel a, a tawpah thil lian thamah pawh lo rinawm thei ta a ni.
 

  “Kan hria ang a, tlem te chunga i rinawm avangin tam tak chungah ka dah ang che,” tih kha, vawi leh khatah chuan a rinawm thut theih lo vang a, thil te tham atanga intanin, kal chho bek bek ang a; tichuan, thil lian thamah pawh kan lo rinawm thei dawn a ni. Mi rinawm ni tur hian Bible chhiar ve fo te, tawngtai ve fo te, inkhawm thin te chu a pawimawh ngei ang. Rilru leh taksa hrisel kan neihte pawh a ngai ang a, chumi nei tur chuan zu leh ruihhlo lakah kan fihlim a ngai ang. Tin, zuk leh hmuamte pawh kan tih loh a, ei chin tawk neih te leh mut hma thawh hmate pawh kan tih thin a ngai ngei ang; tichuan, mi chak ka lo ni ang a, kan lo rinawm thei dawn a ni.

    Khawvelah hian tute nge rinawm ber ang aw? Sap kan tihhote hi chu an rinawm ang a, a nih leh vai kan tihhote hi. Vai rama i zin chuan i bungrua, bag, i kekawr ipte thleng in i ven tlat a ngai, a nih loh chuan a bo daih mai ang. Heng avangte pawh hian India ram chu rinawm lo kan ti thei ang, hetih lai hian vai fel leh rinawm tak tak an awm ve teuh tho tih kha hria ila. Mizoram hi engnge kan an aw, social media lama-ATM-a i pawisa lak hmaih hi a tam tham si a, hemi number-ah hian rawn ngaihven rawh, taxi-ah i pawisa bag, a chhunga lehkha pawimawh leh pawisa eng emaw zat awm hi hemi number-ah hian rawn ngaihven rawh, tih te. Zokhaw lama nghah loh dawr kan neihte han ngaihtuah chuan Mizote chu kan rinawm viau alawm maw le, kan ti thei ang.

    Hetih lai hian krismas bazar-ah erawh sawi tur neuh neuh a tam ve thin hle mai, chu bakah kristian thalai pawl kum tawp report-a biak in hawnga nupui/pasal innei tlem lutuk thinte pawh hi.

Awle, rinawmna hi  kan hnam zia a ni a, i uar deuh deuh zel ang u.

Share now