- Reuben Lalnunthara Hnamte

Khawnge tun tum chu a hre ber ni awm takin in au chhuak leh phawng teh ang. Tunlai chu kan ram inrelbawlna lam hi sawi a tam a, social media lamah kan hmu chamchi a. A hrelo berte zinga mi nimah ila, mahni vei zawngte chu kan auchhuauh pui ve leh ange. Ram inrelbawlna ‘’Politics’’ han ti mai hi chu mizo tawng ang maia kan hriat lar a ni tawh a. Mahse, a awmzia tak hi kan man lo  emaw tih tur a ni a.  A awmzia chu mimal emaw Pawl leh khua leh tui thatna tura kaihhruaina leh dik taka an chanvo theuh an chan theihna tura rorelna dik ken kawh, dan leh thupek, hnam leh hnam chi leh chi inkara inunauna tha thlen tura thawh leh hnamzia rang humhalh leh ramri kham fel leh mipui vantlang thatna tura kawng tinrenga thawhte a ni. Pu J.F Laldailova’n a hrilfiah ve dan chuan Politics chu-“remhria, hmangchang hria, thiam, fing, ram awp dan” titein a hrilhfiah a ni. Politics hi  thil pawimawh, he khawvel kan awm chhunga awm reng tur a ni a. Chutih rualin keini kristian ramah chuan ringtute telna tlaka thianghlim ni tura kan kalpui hi a pawimawh hle.

Khawvel kan awm chhung chuan politics hi a pawimawh reng dawn a, a tellovin kan awm thei lo a ni ber a. Pathianin hnam hrang hrang leh ram hrang hranga awm turin min din a, ram inawpnate min siamsakin min ruahman sak a. Ram a lo din chuan hruaitu leh kaihruaitu an awm ngei alo ngai a, chu chu thiltih makmawh a ni tlat si a ni. Thuthlung hlui hunah khan a hnamthlan Israelte tana hruaitu tur chu Pathianin zawlneite hmangin a ruat thin a nih kha. Ram a lo thangin a lo changkang zel a, hmanlai lal, mi mal rorelna chu tih tawp zel niin, mipui rorelna a lo ding chho zel ta a. Christian ram a ni emaw, a nilo pawh nise ram kaihhruai dan leh inthlan dan chu a in ang tlangpui deuh vek a ni.

Khawvel ram ropui ber zinga chhiar ngam,  America chuan kum 1782 daih tawhah khan ‘In God We Trust’ tih hi Great Seal of the United States atan lo nei tawhin, 1956 khan an Hnam thupui (Motto) atan an lo hmang daih tawh a ni. A hmasa berah chuan an pawisa nawi – Two Cent-ah ‘In God We Trust‘ tih chu kum 1864 khan an tarlang hmasa ber a, a hnu 1957-ah an pawisa lehkhaah an tarlang leh a, an Danpui meuh pawhin pass-in President Dwight Eisenhower chuan July 30, 1956 khan a lo nemnghet tawh nghe nghe a. Chumi atang chuan an pawisa tinah ‘In God We Trust’ tih chu an tarlang ta zel a ni. Goerge Washington, American President hmasa ber a nih khan an ram Danpui (Constitution) an han duang dawn a, ani chuan, “Pathian Lehkhabu Thiang-hlim – Bible tel lo chuan a dik thei lo ang,“ a ti a ni.

America ram chuan Bible mil ang zela ram rawngbawlna nei turin an hruaitu hmasaten ngaihdan khauh tak an lo neih tawh chu tun hun thlengin an la vawng nung a, hei vang hian khawvel ram hrang hrangte pawhin kan chung en ti ila a dik ang. Ram rawngbawlna – politics field-ah lutin theihtawpin inhmang mah sela, anni chuan an Pathian rinna chu an dah pawimawh tlat avangin tun thlengin ram ropui an la ni thei reng hi an fakawmin an entawntlak tak meuh meuh a, kan ram zim tê – Mizoram tan ngei phei chuan a tulin a tul hliah hliah a ni. 

Keini ang ram zimte leh population pawh tlemte la awm te zingah phei chuan mitin tana belhfak leh chhawr theih tur rorelna kalpui hi a pawimawh em em a ni. Dik tak leh a nihna ang tur kan ram hi tun hma atang khan lo kalpui niin, party politics nilova, mipui huap politics hi lo kalpui chho ni ila chuan kan ram hi changkang tak leh, mi rethei em em leh tanpui ngai ngawih ngawih awm lo tur a ni ngei ang.Tunah hi zawng a bilha a tho tawh loh avang hian a hausate an hausa em em a, a zarzo ten neih sen loh khawp an neih tawh laiin a beta te erawh an bet tlawk tlawk mai thin zawng a nih hi. Ram nge kan hmangaiha keimahni hma kan ngai zawk, tih hi zawhna pawimawh tak a ni tawh a ni. 

He kan ram neih chhun hi thinlung takin hmangaih ila, kan tu leh fate chenna tur atan hian ram nuam zawk thlentir tum ila ka duh a ni. Tunah chuan kan thalai zinga tam takte hian ram hruaituteah beisei an nei tawh lo a, politics sawiin mi nuih kan tiza mai mai tawh a nih hi. Politics tha lo hian mi lian ber atanga mi chhe ber thlenga a nghawng vek si avangin kan tuar a, kan rum a, a thente chuan an thih phah zel bawk a nih hi.  Mi mawl leh mawl lo te, naupang leh mi ang pha zan lo thlengin POLITIC tih tawngkam hi kan hmang uar hle. Mi thenkhat chuan ‘Politic’ tih tawngkam hi mi verther leh hlem hle, eiruk ching leh phakar taka khawsak chingte sawina emaw an ti hial thin.

Kohhrana hruaitu leh a kula taia tang te pawh politics-a inhmang tak tak leh MLA leh Minister hial han thleng ta te pawh kan nei ta nual a. A pawimawh ber chu Pathian tih hmasak hi a ni. ringtute phei chu midangte tan pawha entawntlaka a politics thianghlim tak kan khelh hi a pawimawh hle. Kan rama politics kan thlir dan hi a dik tawh loh em avangin, he mi siamtha tur a hmahruaitu ni thei turin tan kan lak a pawimawh hle mai. LaI Isua ringtu leh kristian tamna ram kan nihnaah hian state dangte tan pawh entawntlak leh Isua an lo rin ve phah hialna tur a politics thianghlim, ram nuam leh zalen, thil bawlhhlawh awmlohna ni thei tura tan lak hi kan mawhphurhna a ni e. Politics kan thlir dan tha lo thlakthleng hlawk tur hian tan ila ang u.