Aizawl July 17, 2023 : Assembly speaker Lalrinliana Sailo chuan politics-a inbeih naah a awmna party chhung atanga beih a tawh nasat thin thu sawiin, MNF party chhungkua atang pawhin beih a tawk nasa tih a sawi.

LPS TV programme pakhat 'Election Focus' ah Lalrinliana Sailo chuan a party awmna ngei atangin beihna a tawh nasat thin thu a sawi a, Congress party-a a awm lai pawhin an chhungkua atanga nasa taka beihna a tawh thu leh chumi avanga chhuak a nih thu a sawi.

Tuna a awm mekna MNF party-ah pawh beih a tawk tih sawiin, "Tunah pawh hian Chief Minister leh Deputy Chief Minister te hi chuan min pawm tha in, min hmangaih hle in ka hria, min rawn level ve tum te erawh chuan min bei tak tak," a ti a, tunhnaia mimal taka hming hliau theihna beihna a tawhah pawh chhung lam atanga beihna a tel a rin thu a sawi a ni.

Rina Sailo chuan, kumin MLA inthlanpuiah a din leh dawn leh dawn loh chungchang zawhna chhangin, 'Pathian leh kan hotute thu thu a ni mai,' a ti. 

MNF party-ah ticket a chan lohna tur a awm loh thu a sawi a; tuna a bial Chalfilah candidate a ni leh a nih chuan a khing puite chu vote 1200 atanga 1500 chuan a hneh a rin thu a sawi.

USA-a a zin tuma Deputy Chief Minister deparment chan pakhata cheng nuai 100 ziah bo chungchang a sawi chhuahah Deputy Cheif Minister chu ei ruah a puh lo a, department te thil tih dik lo zawk sawi chhuak a nih thu a sawi.

Thudik sawi niin a ngai a,  a thu sawi avangin an hruaitute'n an khak a ring lo a, ti tha an tih zawk a rin thu a sawi a, sum tih chingpen chungchang ah hian an hotuten a titu an zawn chhuah a, action an lak ngei a rin thu a sawi bawk a ni.