March 26, 2024: Vawiin chhun khan PC Party MP candidate Rita Malsawmi (49) D/o F Vanlalruati, Kolasib Venglai chuan nomination a file.

Nomination file fel hnuah Party office-ah hun hman nghal niin he hunah hian thusawiin, Rita Malsawmi chuan a thiltih tum thenkhat a sawi a, “Mizoram MP mai ni lovin Chhinlung chhuak Zofa leh India ram kristian zawng zawng te tan MP ka ni dawn a ni,” tiin, Mizoram hmasawnna tur te, Zofate himna tur te leh Hindutva do let tura nasa taka ke a pen theih nana tan lak a tum thu a sawi a, MP ah amah vote turin mipui a sawm bawk a. Thlan tlin anih chuan Aizawlah office a hawn dawn thu sawiin, "India ram pum MP zawng zawng pawhin an biala office an neih theuhna tur Dan siam anih theih nan Bill ka pu lut ang a, min pass pui ngei ka ring a. Mizoram mai ni lovin Indian history-ah Zofate zinga mi ngei hian bung thar tam tak kai pui ka tum dawn a ni. Mizoram hmasawn hi ka duh ber a, tupawh Mizoramah sawrkar se a thawhpui tur thu a sawi.

Rita Malsawmi hi LT Muana (L) leh F Vanlalruati, Kolasib Venglai te fanu hi, November ni 22, 1975-a Hortoki-a piang; Laipuitlang, Aizawl-ah a khawsa mek a ni a. Mipuiin amah kan hriatna ber chu hla phuah leh zai lamah a ni. Zai lama Mizo ten kan hriat hmain Kolkata-ah Koly Band-ah zaitu a ni. Mizo zinga modelling lama sulsutu, Kolkata-a modelling hna thawk a, Modelling Agency te hial partner-ship-a lo nei tawh a ni. Mizo zinga Five Star Hotel-a thawk hmasa pawl a ni bawk. Mizoram a lo chhuah hnuah DDK-ah news correspondent hna a thawk thin a. Film lam luhchilhin ZTS Audio & Visual Production-a producer a ni a, intihsiaknaah pawh lawmman pakhat-na te lo dawng tawh a ni.

Social work lamah Joshua Operation-ah President nilai niin, ZORO Gen. Hqrs.-a kum 10 chuang Secretary nihna chelh tawh a ni.