- F Thangluah

Mihringte hi kan pian chhuah dan reng rengah kan la thlen ngaihloh ram thlen chakna leh kan la hmuh/tawn ngailoh hmuh/tawn chakna hian kan khat a. Hei hi hmasawnna min petu leh kawng tam takah kan nun khalh kaltu chu a ni ngei mai. Amaherawhchu, chutiang chakna chu kan thunun hneh ta thin lova. Thunun ahnehin kan vulh lian sauh sauh zel mai zawng a nih hi. Chutiang chakna/duhna mihring ten kan neih zingah chuansum leh pai neih belh zel duhna hi kan thunun hleihtheih loh leh thunun atana kan phalloh a ni mai awm e. Kan neih tawhsa bak leh kan mamawh tawk kan hmuh baka a tam thei ang ber chhek muk chhoh duh deuh vek kan ni te han ti ila kan sawi sual tam kherlo mai thei a ni. 

Hei hian a mawi leh mawilo, awm leh awmlo pawh min dawntir lovin tam tak chu sum atchilhna thangah nghet takin an tang ta thin a ni. Tang satliah mai pawh nilo, an nunna thlengin a tawrh phah thin. Mihring kan nih chhung hian mamawh tam tak chu kan nei ngei mai. Amaherawhchu chung kan thil mamawh zinga tam zawk chu in titeh ang, mamawh lo thei lova kan insiam avang te, kan mamawh miahloh tih kan hriat reng; mahse midangte ngaihsan(intihvei) nan tea kan duh thin vang a ni.

Chung kan duhna/mamawhna thunun har tak chuan mawi leh mawilo, mihringte rilru inpawhna tibuai vek khawpin min han bawh buai ta thin a. Kan awmdan hian midangte nun a khawihbuai em tihte chu kan ngaihtuah ta thin lova. Neihbelh zel chakna chuan kan rilru ngaihtuahna a luah khat tlat a, kan mitmeng pawh hi sum menin a meng sen rem  vek mai thin zawng a nih hi.
    
Kan khawsak dan hian neihbelh zel a tulna leh chakna a ken tel tlat avang hian mihring leh mihringte inkara inlaichinna mai nilo, mihringte leh kan chhehvele nunna nei thing leh mau leh nungcha chitin reng te nen kan inlaichinna pawh hi a tibuai zova. Chu sawhkhawk chuan keimahni a bul tumtu bawk chu na takin mi a deng let leh a. Tichuan kan hriselna te, kan mamawh tawk kan hmuhna hnar leh kan thil neih tawhsate tichhia/tibuaiin nasa zawka mamawh phuhruk tulna chuan mi a nangching ta thin a. A chhe zawngin thil a kal ta reng mai thin zawng a nih hi.

Suma kan duhamna chuan chhungkua kan inlaichinna te, thenawm khawveng kan inlaichinna te, ram leh ram inpawhtawnna te eichhiain kan nun chu hreawm takin kan siam ta thin a ni. He duhamna thinlung hian keimahni mimal nun mai bakah ram hmasawnna thleng pawhin nghawng chhe tak a nei zel a. A tithei remchang thenkhat ten tithei velo tam takte innghahna tur an lo paipawn haw tawn tawn thin bawk nen. Tichuan ram ang pawhin hmasawnna kawng zawh chu a sak ta talh a ni. He sum atchilhna thangah hian kan tan ngheh hlawm em avangin midangte bum thluk chu kan hrehlo em em a. Midang ten hah taka an thawhchhuahsaa  lo inlaklen leh intarlan chu zah a hnekin kan la ngainep zui thin a nih hi.

Thil tenawm zingah chuan suma duham luat tukna hi a tenawm uchuak ber hian a rinawm. Kan Bible meuh pawhin ‘Sual tinreng bul’ a tih hian a sawifiah ber awm e. Kristiante zinga hremhmun population titamtu ber pawh ‘Sum’ hi a nih hmel ber. Sual tinreng bul hi kan belbul nasa em mai.