Robert Romawia Royte hi MP-ah a tlin chuan Mizoramin a hlawkpui ang : Nagaland CM Aizawl; Nagaland Chief Minister leh hmarchhak bial tualto party inhlawm-khawma convener ni bawk Neiphiu Rio chuan UDF in Lok Sabha MP atana an candidate Robert Romawia Royte chu thlantlin anih chuan Mizoram in a hlawkpui ngei a beisei tih a sawi. Nimin United Democratic Front (UDF) campaign office a chanchinbumite a kawm naah North East Regional Party Front a convener hna chelh mek Neiphiu Rio chuan Robert Romawia Royte chuan an state (Nagaland) tan cheng vaibelchhe tam tak a hailut tawh tih a sawi a, mi chak leh hnathiam anih avangin Mizo mipuiten an hlawhpui dawn a, chuvangin thlangtling ngei turin a ngen tih a sawi a, thlantlin anih chuan amah nen hmasawnna kawngah hna an thawkho thei dawn niin a sawi bawk. Neiphiu Rio chuan central ah NDA kaihhruai a sawrkar a beiseiawm tih sawiin hmarchhak bial tualto party North East Regional Party Front te chu NDA a tel an ni a, sawrkarna an chan chuan Ministry siam kawngah pawh hmarchhak MP ten dinhmun tha an chan theihnan nasa taka hmalak a tum tih a sawi. Nagaland Chief Minister chuan, Electronic Voting Machine (EVM) chu tih danglam theih a ni a ti a, "tun tum inthlan ah hian EVM kan hmang dawn anih pawhin VVPAT awm tel ngei hman kan duh a, hei hi a theihloh chuan paper ballot hmanga inthlan leh kan duh a ni," a ti a. Ram chang-kang zawk USA, Europe leh Japan ah pawh EVM hmang lovin paper ballot an hmang zawk niin a sawi. North East Regional Party Front chu hmarchhak biala tualto party ten October ni 20, 2013 ah Guwahati a an din a ni tih sawiin central hian hmarchhak hi pakhat angin min hmu a, kan harsatna leh mamawhte hi tangruala kan thlen ho thin a pawimawh a, kan tanrual a ngai a ni a ti a. NERPF chuan Bangladesh atanga dan lova lo lut thin tihtawp, Armed Forces Special Power Act tihtawp, Brahmaputra lui hnar lama China in tuikhuah siam a tum tilo tur ngen, hmarchhak bial zirlaite himna ngaihtuah, look east policy ngaih pawimawh leh thildangah te hmalak a tum tih a sawi bawk. Nagaland CM hian Press mite a kawm zawh hian Hnam Runah thu a sawi nghal a, tlaiah Nagaland panin a haw leh a ni. Nagaland CM hi Lalthara IAS (rtd.) leh mi pawimawh dangten an tawiawm.