Kum liam mai tura khawvela goal thun tam ber, Cristiano Ronaldo chuan Saudi Pro League (SPL) chu player langsar zawkte pawhin an pan zel a beisei.

Portuguese forward kum 38 mi hian nikum tun ang hunah khan sawi neuh neuh tam tak karah Manchester United atangin Al-Nassr a pan a, a luh tirha a sawi ang bawkin a khelhna league chu a thang zel niin a sawi.

Inrinni zan khan league-ah 4-1-a Al-Taawoun hnehin Ronaldo hian goal khat a thawh veleh a, kumin chhunga a goal 54 thunna niin goal thun tam ber a nih mekna a nemnghet nawn leh.

Ronaldo hi goal 52 ve ve thuntu, Bayern Munich leh England striker Harry Kane leh PSG and France forward Kylian Mbappe te chungah a awm a. Inkhelh zawha an kawmnaah kum lo thar turah pawh goal a thun chhunzawm ngei a beisei thu leh a tum thu a sawi nghal.

Saudi chanchinbu, SSC Sports-in inkhelh zawha an kawmnaah, “Ka hlim tak zet a, ka tan leh kan zavaia tan kum tha tak a ni a. Al-Nassr leh kan ram tan goal tam tak ka thun a, ka hlim a, nakumah pawh tih leh ngei tumin ka bei ang,” a ti.

SPL chungchang pawh sawiin, “He league hi a thang a, a inelna a san avangin player-te pawhin lo kal ve an duh. He hmuna ka lo kal hi ka lawm a, player langsar dangte pawh an lo la kal zel ka beisei,” a ti.

Ronaldo hian December 30, 2022-a Old Trafford chhuahsana Saudi Arabia-a contract a ziah ni khan SPL hi a la than zel tur thu leh nakin lawkah chuan khawvela league lian, mite ngaihven leh mi khelh châkna a nih tur thu a lo sawi tawh a ni.

Balon d’Or vawi nga dawng tawh hi kumina goal a thun hi vawi 59 a khelh atanga a thun a ni a, kum khat chhunga goal thun tam ber a vawi nga nihna niin kum 2011, 2013, 2014 leh 2015 te khan a lo ni tawh bawk.

Al-Taawoun an hneh rual hian an chung chiaha awm, league-a hmahruaitu, Al-Hilal hnaih phahin an karah point sarih chauh a awm ta a. Vawi 19 an khel tawh.

Real Madrid forward hlui, Ronaldo hi khelmualah hmuh zui tur a awm mai rih dawn lo thung a, Qatar-a AFC Asian Cup khelh a nih dawn avangin Asia-a ram tam tak league an chawl rih dawn a, February 12-ah Asian Champions League-ah Al-Feiha an hmachhawn chu an chet chhuah lehna hmasa ber tur a ni dawn chauh a ni.