Zanin zanlai dar 12:30 hian Euro 2000 last-16-ah ram tana goal khung hnem ber record siam thar hlim Ronaldo leh a pawl ten Seville khelmualah khawvel team tha ber Belgium an hmachhawn dawn.

Belgium hian group B atangin hnehloh nei lovin group hmahruaitu niin  knockout round an lut thei a, Portugal erawh group of death an tih mai Group F atangin France leh Germany hnuaia awm chungin round sang zawk hi an inpet lut ve hram a ni. 

Belgium hi match thum an khelh tawhah chak vek mahse, zanina an hmachhawn tur Portugal team hi Euro champion lai an nih bakah Champion rin kai phak an nih bawk vangin Roberto Martinez leh a naute hian an namnul ngawt thiang lovang. .

Red Devil hian team tha Russia 3-0 zetin an hneh thei a, team nem zawk tura ngaih Denmark 2-1 in an hneh hram thung. An group zinga team chhe ber tura ngaih Finland chu Lukas Hradecky-a own goal nei chung pawha an draw mai tawh dawn emaw tih tawh hnuah Romelu Lukaku-a goal hmangin an chak thei hram.

Martinez-a enkawl Belgium te hi match 12 zet hneh loh nei lovin an kal tluang tawh a. Zanin Belgium leh Portugal chak zawk hian, quarter-final-ah tun Euro 2020 a khel tha tak Italy leh Austria chak zawk an tum ang. 2018 World Cup pathumna Belgium hi kum 1980-a pahnihna an nih bak tournament lian thamah uanpui tham result an nei leh tawh rih lo thung. 

Group F atanga knockout round rawn lut tur hian Portugal hian 4-2 zeta Germany an hneh loh hnuah Nilaini zan khan Ronaldo goal hnih hmangin France 2-2 in an draw hram a, June ni 15 a sithum faia Hungary an lo hneh tawh vangin pathumna ni chungin an lut thei hram.

Knockout round lut turin Portugal hian Cristiano Ronaldo penalty vawihnih hmangin world champion an draw a, tihian ram tana goal thun tam ber Ali Daei-a goal 109 a nihrual chiah. Zanin hian goal khat tal a thun leh a nih chuan Ronaldo hian record ropui khum harsa tak tur a siam ang. 

Portugal hi Euro 2016-a harsa taka pathumna ni chunga group stage paltlang thei hram, a hnua champion nomawi chawi zui theih an nih vangin zanin inkhelah hian tlang zawkah tang mahse a awmlo hran lo. Chutih rualin, Kevin De Bruyne, Eden Hazard leh Lukaku te awmna team hi chaklo zawk tura dah erawh thil har tak a ni ve ang. 

Belgium ram hi vanglai hmang mek an ni a, tun Euro 2020-ah hian an champion lo a nih ngat chuan an Golden Generation hun chhung hian tournament lian thamah  champion na hun tha an nei tawh lo maithei. Tun hnaiah an game a nung tha hle a, an game khelh hnuhnung vawi 6-ah vawi 1 an draw tih loh an chak vek thei. Portugal pawh hi an che chhe hran lo va, an game khelh hnuhnung  vawi 6-ah tum 3 chakin vawi 2 an draw a, chakloh vawi 1 an nei thung.