Thangkhat lian zet chu football khawvelah C. Ronaldo leh Lionel Messi te hian ro an rel tawh a, anni pahnih hming lam ri lo chuan football a sawi theih meuh loh. Titi honaa footballer tha leh thiam ber kan sawi changin anni pahnih hming hi a langsar ber a, mi tam takin inhnial nan an hmang fo bawk.  FIFA leh football pawl lian dang pawhin anni pahnih inkarah hian a thiam zawk thlan har tiin inhnial theih takin anni pahnih hi football thiam chawimawina an linhlan chhawk tawh thin a ni. 

Club inelna ngaihhlut hlawh ber UEFA Champions League-ah meuh pawh anni pahnih hmel hmuh loh hi chuan a kimlo tlat thin. An thlen san thin vang pawh a niang’e. Hun a liam a, an kum te alo tam ve tial tial bawk nen kum dang angin an team leh club tan an thawhhlawk tawh lo nge, kumin Champions League-ah pawh an team te  quarter final an thlenpui zo ta tlat lo. Tun season hi kum 15 chhunga C. Ronaldo leh Lionel Messi te pahnih hian UCL quarter finals an khelh loh vawikhatna tur a ni. 

Mi thenkhat chuan an hun a tawp ve tan niin an saw. Anni pahnih thlak turin  lal thar Kylian Mbappe leh Erling Haaland te hun a rawn her chhuak nia sawiin Mbappe leh Haaland-a te thiamna an sawi uar tan hle. 

Hemi chungchangah hian Brazilian legend Ronaldinho-a  ngaihdan erawh a nilo a, a pawm lo hle. Ronaldinho chuan, "Messi leh C. Ronaldo te chu UCL atangin a tla ngei e, mahse Mbappe leh Erling Haaland te nena khai khin chi rual anni rih lo. Tunah pawh anni pahnih hi chu an khelhna League bikah pawh top scorer anla ni thei ve ve. An pahnih hian football a mimal chawimawina sang ber Ballon d'Or  tum 11 an dawng tawh a, Champions League nomawi vawi 9 leh League title tum 20 lai an chawi tawh bawk a, anni pahnih inkarah hian thil ropui thleng a tam luttuk,” tiin anni pahnih hi an la chuai loh thu leh an ropuina hi midang nena tehkhin rual a nih loh thu a sawi. Sawi zawmin,“Ka ngaihdanah chuan Cristiano Ronaldo leh Lionel Messi ten hun ropui tak min hmanpui kan theihnghilh hma lutuk hi chu inzahlohna angah ka ngai,” a ti hmiah. 

Anni pahnih hian an club khelh mekna an chettha pui tawklo hle a, hemi vang hian an club pawh hian nidang angin an mamawh tawh loa ngaiin club dangin an rim sak reng a, Cristiano Ronaldo chu PSG leh Real Madrid lamin an hel mek a, Messi pawh hi Barca lamin nghet angin sawi reng mahse club hausa deuh chuan an rim ru reng niin an sawi.