Aizawl December 12, 2022 : Mizo Hnam Run chhung inkhawma thusawitu Dr. R. Lalthangliana chuan, rorel ngawr ngawr chu a chaka chak chi loh niin a sawi a, inthlan leha an MLA neih mek zat pawh nei tawh lo tur anga a sawi Congress party leh thawm nei lian tak chunga chhim lama nil ZPM ten MNF sawrkar an thlak a rin loh thu a sawi bawk.

Health Minister Dr. R. Lalthangliana chuan, "Rorel ngawr ngawr hi a châka châk chi a ni lo, ram siam hna thawk tura inpekna rilru nei a, hmanrua a inpek a ngai. MNF sawrkar ah harsatna liantham tak tak, Covid, Vawkhri, Raltlan, Lirnghing leh Ramri buai kan hmachhawn a. Hetiang buaina kara sawrkar hmalakna a chhuanawm a. Covid hripui kara kohhran leh tlawmngai pawlte hmalakna a ropui takzet bawk a, an chungah lawmthu ka sawinawn leh duh a ni. Tun term ang reng renga MLA tha kan neih hi ka hre ngailo. Bial ngaihsak, mi thiam tak tak kan nei a, Pathian tihmi CM kan nei bawk a, hripui leh harsatna lian tak tak avangin ram siam hna thawk turin hna kan thawk tan chho thei dawn chauh a ni",  a ti.

MNF Adviser chuan, "India rama tlachhe mek, Mizorama MLA an neih mek zat pawh nei tawh lo tur, Congress hian MNF sawrkar hi a thlak dawnlo tih a chiang. Social media-a innghat, chhim lamah pawh thawm lian tak nei chunga nil ZPM pawh hian MNF sawrkar hi a thlakin a rinawm loh a. Thawm chauh lian, Tiau chunga In sa ang deuh an ni a. An la tuiril deuh. Vawikhatmah budget la pharh ve ngailo te tan, tunlai thiamna sang tawh takah hian sorkar siam a beiseiawm loh a ni," a ti bawk. 

Dr. Thangtea chuan, "Sawrkar leh turin rilru hrisel tak puin thawh a ngai a, hah a tul bawk. Pathian thu a kan awmna hi kan sawrkar lehna tur a ni. In sangmara, khawngaihna, dawhtheihna leh hmangaihna nen thawk ang u," tiin party mipui kalkhawmte a fuih bawk.