Laltlankima Hnamlêr -

Mizorama kohhran hrang hrangte hian kan ram leh hruaitute tana tawngtaina hun hi kan nei fo thin a. Hun khirh tak kan tawn lai te, inthlanpui lai te leh hun pawimawh tak takah phei chuan kan tawngtai nasa lehzual a ni. Heng huna kan tar chhuah fo, Bible chang Rom 13:1-7 hi lo zirho ta ila.

    1.    Mi tin an chunga rorêltute thu thuin awm rawh se. Pathian thu lovin tumah rorêltu an awm si lo; rorêltua awmte hi Pathian ruat an ni. 

    2.    Chuvângin, tupawh rorêltu hnial chu Pathian ruat dodâl an ni a; a dodâltute chuan anmahni chungah rorêlna an hmu ang. 

    3.    Rorêltute chu thil tha titu tân chuan hlauhawm an ni lo va; thil tha lo titu tân erawh chuan hlauhawm an ni. A nih leh, rorêltu hlau lova awm i duh em? Thil tha ti la, a fak i hlawh ang chu; 

    4.    Ani chu i thatna tûra Pathian rawngbâwltu a ni si a. Nimahsela, thil sual i tih chuan hlau rawh, khandaih chu a keng mai mai si lo va; ani chu Pathian rawngbâwltu, thil tisualtu chunga thinura phuba latu a ni si. Rom 13:1-4

    Kan hriat tlan theuh angin Pathian thu hi miin a Kristian nun atan thui tak chu chhiarin a hre thiam thei a ni. Mahse, thenkhatah chuan a ziaktu leh a ziak hun laia chanchin chipchiar deuhva hriat phawt ngaite a awm a; chuvangin, zir ngun a ngai ta thin a ni. Kan chang thlan pawh hi Bible chang awl a ni miah lo.

    Emperor Klaudia khan kum 49 AD khan Rome khawpui atangin Juda zawng zawnga chhuahtir vek a; mahse, kum 54 AD-ah a nupui Julia Agrippina-in a thah avangin a fapa Nero chuan lalthuthlêng a rawn luah a, Juda ho pawh Rome khawpuia luh phalsak an ni nghal deuh mai a. Paulan Rom lehkhathawn a ziak (57/58AD) khan Kristiante tan a la ralmuang a, a hnu kum 59AD-a Nero-an a nu a thah hnu khan boruak a inthlâk tan chho a ni.

    Mizo Kristiante hian kohhran leh khawtlang bâkah ram pum huapa inthlanna kan neiha inthlan result a lo chhuah hian a chak lam zawk hian Rom 13:1-2 hi chang chawiin an lalna leh thuneihna kha Pathian ruat ni ngawih ngawihin an hre thin. Mahse, kan tihsual fo chu a dawt leh chang 4-7 kha kan zir tha peih ngai lo. 

    Chang 3-na leh chang 4-na hi Hitlera-te, Myanmar roreltute leh roreltu, sual lam awn tlatte nên han dah tlang teh ang. “Rorêltute chu thil tha titu tân chuan hlauhawm an ni lo va; thil tha lo titu tân erawh chuan hlauhawm an ni.” Chang 1&2-a Pathian ruat nih kan hauh (claim) ngam a nih phawt chuan a dawt chiah chang 3-nain a sawi, ‘Rorêltute chu thil tha titu tân chuan hlauhawm an ni lo va’ tia a sawi khi Hitler-a te leh roreltu Pathian zah lote hi thil tha titu tan an hlauhawm nge hlauhawm lo le? Hitler-a hnuaiah Juda leh Kristian tha tak tak, Bonhoffer telin eng zat nge tham ral le? Chang 4-nain a sawi, ‘ani (roreltu) chu i thatna tûra Pathian rawngbâwltu a ni si a,” tih a ni a, Hitler-a te, Myanmar sipai lalte bakah mipui anmahni thlangtute an retheih tial tial laia roreltu hausa tial tialten Pathian rawngbawltu nih an hauh ngam dawn em ni? 

    Chang 6-na leh 7-na phei chu nimin lama kan tar lan atangin kan hria a, chhiah pek dan tur ngaihtuahaia chhiah awl tum tlat kan nih chuan he chang hi kan hauh ngam lo lehzual dawn a ni. Chuvangin, he Rom 13:1-7 hi roreltu thlan apiangte tan a inmil (applicable) vek lo thei ta a ni. Chumi awmzia chu chang 3-7 khi kan hauh ngam loh chuan chang 1-2 khi hauh loh ngam a ngai tihna a ni.

    Heti lo zawng pawh hian, Rome sawrkar Nero-te hunlai kha democracy ni lovin aristocracy a ni a, an hunlaia Kristiante khan an duh tak an thlan chhuah a ni lo. Hitlera te, leh vawiina roreltu tam berte erawh hi chu mipui thlan an ni. Hemi avang hian Nero-a te hunlai (aristocracy) angin rorelna leh roreltu duh lotute hmehmih ngawt kha a dik lo ta tlat a ni. An duh lohna kha zirchiana Pathian leh mipui tana thil tha duh vanga ti an nih si chuan an thu kha lak urhsun a ngai ngei ang. Hetia sawi hian Rom 13:1-7 hi kan paih thla tihna pawh a la ni chuang lo. Pathian rorelna zau tak (sovereignty) hnuaiah heng thilte hi a thlen a phal a; mahse, Pathian ruat an ni e, tihna a ni kher lo.

    Kan hriat tur pawimawh êm êm chu Rom bung 13 hma hian Rom bung 12 a awm tih hi a ni. Bung 13:1&2-a, “Mi tin an chunga rorêltute thu thuin awm rawh se…rorêltua awmte hi Pathian ruat an ni… tupawh rorêltu hnial chu Pathian ruat dodâl an ni a,” tih hi kan hauh ngam a nih chuan bung 12-a, “rorêltuin taima takin rêlrawh se;…Sual lam chu hua ula, tha lam chu pawm tlat rawh u…. Mi zawng zawng ngaiha thil mawi ngaihtuah lâwk rawh u… Sual ngamchein awm suh la, thatnain sual chu ngam zâwk rawh,’ tihte hi bung 12-ah a awm tih hriat tel a ngai a ni. Hemi avang hian Rom 13 hi sawrkar kalh apiangte thuneihna hmanga hmehmih theihna licence ni lovin Kristian nun dan tur Rom bung 12-a a sawi chhunzawmna zawk a ni.

    Hitler-a te, Myanmar sipai lalte ang ni lovin keini Mizote chu kan ram roreltuah Kristian deuh vek kan neih thin avangin ringloten anmahni thuneihna an lo hmang sual (abused) a nih pawhin keini ringtute chuan kan rorelna min kaihruai turin Pathian thu kan nei a; chuvangin, mipui sang tam tak tana that tlanna tur ngaihtuah leh tihlawhtling tura hmalak hi kan tih tur makmawh a ni ngei ang.

    Chona: Roreltu tha tak beiseitu ka nih lai hian khua leh tui tha tak nih tumin duhamna te, mahni hmasialna te, sawrkar thil dim lohna te, phakar leh zawmthaw taka hnathawh te hi ka malmak ngam dawn em? US President 16-na, Abraham Lincoln khan democracy tihian a sawi fiah a nih kha, “Democracy chu mipui sawrkar a ni a, mipuiin, mipui tana ro an rel hi a ni,” (Democracy is a government of the people, by the people and for the people). Kan thupui “Roreltu Vs Khua leh tui” tih hi democracy anga kal lote ram nen a inmil viau va. Democracy zawm tak takte mila kan thupui kan dah dawn chuan ‘Khualeh tui Roreltu’ tih zawk tur a nih hmel. Kristian nun hi democracy hnuaia awmah nge kan ngaih democracy chungah?