DOWNLOAD OUR APP

Read latest news on your phone
app-store

Rossi a phur tawh | MotoGP season tan niah Marquez tel dawn lo

Mar 28, 2021

Kum 42 mi Rossi chu a team thar tan MotoGP-ah season vawi 21 na turin turin a inlan dawn

March 28, 2021 : Khawvela bike intlan siak ngaihhlut hlawh ber MotoGP season thar chu vawiin hian Qatar-ah an tlan tan dawn a,  hliam vangin tum ruk zet champion tawh Marc Marquez erawh a tel ve thei dawn lo. Vawi sarih champion tawh Valentino Rossi, 42 chu a team thar tan MotoGP season a vawi 21 turin a inlan dawn. 

Season liam taa champion Suzuki rider  Joan Mir chuan Honda driver Marquez-a tel thei lo tur chuan a thawn hle niin a sawi a, Marquez hi race vawi thumnaah erawh a inlan theih ngei a beiseiawm.  Nikum khan Marquez, kum 28 hian a accident naah a ban dinglam a tinaa, vawi thum lai zai a tawk tawh a ni. Portimao (Portugal) atangin a tlan ve tan thei dawn chuh avangin atan championna kawng a zim dawn hle a ni. 
Coronavirus hrileng avangin nikum season khan race vawi 14 chiah an tlan thei a, tun season erawh race 19 neih an tum a ni. 

Ducati rider thar Australian Jack Miller, kum 26 chuan an intlansiak tur chu a tan chona lian tak a nih thu sawiin 2007-a a ram pui Casey Stoner-a’n mak danglam taka Ducati a champion pui ang kha a tih ve theih a rin loh thu a sawi. Miller hian pre-season khan lap record a siam avangin amahah beisei an nei sang hle thung. 

Rider ropui podium-a vawi 199 lawn kai tawh Rossi chuan vawi 200 lawn  tlin ngei a tum ruh hle bawk a. Veteran Rossi chuan, “School kal ni hmasa ber ang mai a ni,” tiin intlansiak a chak tawh thu a sawi chhuak. Sawi zawmin, “Hun rei tak hnuah ka team ka thlak a, mahse hrehawm tihna ka nei hran lo - Ka upa ve viau tawh nain motorcycle khal leh MotoGP tlan hi ka la thlahlelin nuam ka la ti em em a ni. Ka result neih dan a zirin kumin bak hi ka inlan tawh lo mai thei,” a ti bawk.     

Share now