Aizawl: Sport Minister Robert Romawia Royte hovin Zirtawpni khan Mizoram sawrkar hotuten Civil Aviation Ministry Secretary R.N. Choubey chu hmu in, February 10, 2019 atanga Jet Airlines ten Mizoram-a an service an tihtawp tur chungchanga hmalak dan tur an sawipui.   Minister chuan thlawhna service tihtawpin mipui tan harsatna siam a nghawng thui tak a neih theih dan te hrilhin, hmalakpui turin a ngen a. Civil Aviation Secretary chuan hma lakpui nghalin India ramchhunga thlawhna service mek airlines dang 5 – Indigo, Vistara, GoAir, SpiceJet leh AirAsia te a be pawp nghal a. Mizorama an service theih dan tur ngaihtuahpuiin, chak taka a lo bawhzui tur thu a sawi bawk. Minister hi Principal Secretary Lalnumawia Chuaungo-in a tawiawm a ni.