Aizawl August 27, 2024 : RTI Act hmanga zawhna Mizoram PWD Building Division-in an chhanna atanga a lan danin, ZPM sawrkar hnuah Assembly Speaker Lalbiakzama Bangla cheithatna leh bungraw lei nan Rs 23,40,000/- sen a nih thu tarlan a ni a. Bangla cheinan bik Rs 8,40,000/- sen niin bungrua - Sofa, dining table, doormat, etc. lei nan nuai 15 sen a ni bawk.

MNF chuan, "Chief Minister Lalduhoma'n sawrkarna an chan hlima thuthar lakhawmtute a kawmnaah Bangla chei nan sum hman vak vak tha a tih loh thu leh chutiang tih ve an tum loh thu a sawi a. Chutiang a nih laia Speaker in a bangla Rs 8,40,000/- laia a chei tir leh bungraw - Sofa, dining table, doormat, etc. lei nan nuai 15 lai sawrkar pawisa a hmang hi a intuha lo hle a. Hei mai bakah hian Minister leh MLA dangte quarter pawh chei that a ni hlawm tih kan hria a ni," an ti.

"ZPM hi an sawi loh ang hlirin an awm tih hi chu tlang hriat a ni tawh a. Mipui pawhin ngaiah kan nei tawh a. Chutih laiin sum renchem leh sawrkar insawhngheh kumah an puang mek a. An mahni ber a bawhchhetuah an tang zel mai hi a pawi hle a. Sum indaih lohna avangin Zoram pum kawng chhe em em pawh an siam thei lo a, sawrkar-in vaibelchhe telin sum a puk reng a. Chutih laia Bangla cheibawlna tura sum tam tak a luang hi a uiawm hle," an ti bawk.

MNF ZPM sawrkara thuneitute hian dawt sawi an hreh lo a, an intiamna bawhchhiat an hreh lo a nih pawhin mipuite hi chhete talin zah ve se an duh thu an sawi bawk.