Kum tluana mitin nghahfak Krismas leh Kumthar a hnai tawh a, khawlai tei chhuak an tam a, kum dang ang bawkin kal hleihtheih loh khawpin kalkawng a tawt tan der tawh a. Mipui chetvel awlsam zawk nan sawrkar lam chuan ‘No Vehicle Zone’ a siam a tum bawk a ni. Hunpui kan tawn apiangin ruahmanna tel lo a khawpui din hrehawm zia kan hrechhuak thin a, phunnawi thawm a awm thin bawk. Ruahmanna tel loa din khawpui chuan a chhunga chengte chu holam te teah harsatna a siam thin a, khawpuia chengte an chiang ber anga, a taka tawngtu an ni mek a ni. Ruahmanna a mumal loh chuan khawpui a thang zel a, khawlai a tawt a, a tih tawp bakah hun paih lo thei loin mi a siam thin. Khawpui tawtah chuan chetvel a harsaa, nun a hautaka, khawsak phung awmze nei lo a hring mai thin. Ruahmanna tha tak atanga din khawpuia chengte chuan tul loah hun an paih mang loa, chet vel an awlsam phah a, thil tam takah sum an seng tlem zawk bawk. Mizorama khaw lian deuh hoah hian mihring an pung zel a, Aizawl-ah an pung chak lehzual a ni. Inthlah pun ai mahin beiseina nena pem lut an tam vang a ni pakhat a; mihring cheng tam zawk hi mi In luah an ni a, hei hi a tichiangtu pakhat a ni awm e. Chenna In a pung lo thei loa, hmun ruak apiangah inhnaih te tein In a ding khup a, khawpui titawtu an ni zel a. Khawpui tawt tak, chet hleih theih lohna khawpui a ni tial tial ang. Sawrkarin tlai khaw hnua a din Aizawl Development Authority pawh khan In sa tharte tan ‘dan’ a duang a, a bilh atanga a thoh tawh loh chuan a sawngsawhlawt mawh khawp mai. Aizawl Municipal Council pawh hian a duh angin hma a la thei meuh lo niin a lang. Thenawm pain a ram chin chiaha In a sak si chuan, a sa thar tur chu an inkara ram zuah tura beisei hleih theih a ni lo. Office lehkhaah ziah fel a nih rualin dawt sawi an awm belh zel tho tho a ni. Mi ramah chuan khawpui a tawt chuan sawrkarin a zauhna turin ruahmanna a siam a, a bul lawkah khawpui/veng lian a din mai a. Hma lam hun thlirin veng leh veng te chu inhlat takah a dah a, khawpui lian thawl nuam tak a piang thin. Gujarat-a khaw lian tak Ahmedabad khu ‘planned city’ a ni loa, a tawp bawk a ni. A bul lawka Gandhinagar chu duan fel thlap a ni a, thing phun a ni a, kawngpui, lui kawr felfai taka dah a ni a; dan leh hrai duan sa thlap a ni. Kolkataah pawh Salt Lake veng khu ramchhia a ni thin a, ruahmanna a tha a, tunah chuan hmun nuam tak a ni tawh a ni. Tunlai khawvelah chuan mihring hian nitina nung tur ringawtin mamawh ‘basic anemities’ a ngah khawp a; tui hnianghnar, khaihlak awm lo kawphetha, damdawi In, kawngpui tha, boruak hip luh tlak a awm loh chuan mihring a nung thei lo. Tun anga mihring kan pun zel chuan Aizawl hian a chhunga cheng te hi nitin mamawh a hnianghnar a pek theih loh hun a nei ang tih a hlauhawm tan rum rum e. Heng bakah hian thil pawimawh tam tak a la awm a, khawpui thar/zauh kan mamawh a, ruahmanna felfai a tel a tul a, tun leh tunah hian bul tan a hun tawh hle.