ZALEN September 9, 2026: Disaster Management and Rehabilation changtu Minister Prof Lalnilawma chuan tun lai ruahsur nasa avanga Mizoram hmun hranga hranga harsatna thleng mek chungchangah mipuite chiai lo tur leh harsatna tawk ten thuneitute hnena thlen thuai turin a ngen a, DM&R te koh theih rengin an awm a ni, a ti.

Video kaltlanga thuchah tichhuakin Minister chuan tunhnaia ruahsur nasa avangin hmun hrang hrangah lei min leh kawng ping a awm thu leh heng harsatna tawkte tanpui turin khua leh veng tinah Zonal Officer an awm tih a sawi a. Heng bakah hian Village level leh Local level-ah Disaster Management Committee a awm thu te, DC tinte kaihhruainain Disaster Management Committee din vek a nih thu a sawi bawk a. Anni hnenah hian harsatna leh buaina tawk ten rang taka report thin turin a ngen a ni.

Mipuiten smart phone application kaltlanga harsatna an thlen theihna tur DM&R Department chuan Khuarel App a siam chu hmang tangkai turin mipuite a chah bawk a. A bik takin veng chhung leh khaw kar kawngah leiminin kawng a lo hnawh ping emaw, a lo dang a nih chuan he Khuarel App hmang hian report thehluh theih a ni, a ti a. “Zonal Officer te leh DC ten an lo hmu vat ang a, hmalak dan tur rang takin an ngaihtuah thei dawn a ni,” a ti.

PHE Department changtu ni bawk Prof Lalnilawma chuan tui sem kawnga harsatna thleng thei chungchang pawh sawiin tun hnai ruahtui tam zualah Aizawl chawmtu, PHE Department-in tui lakna atana an rinpui ber Aizawl Greater Water Supply Scheme Phase III chu leiminin a hnawh ping a, tui pump theih a ni lo tih a sawi a. Setlak lam atanga gravity hmanga tui fim pump tura an lakluh thin pawh Aizawl Western by-pass road siam mek leivungin a tinu ve leh a; chuvangin, harsatna an tawk mek tih sawiin tui harsatna awm thei chungchangah pawh mipui hriatthiamna a ngen a ni.