“Malsawm ruah te a tla ang .. “ tih pawh duh tawk lova, “Ruahpui meuh rawn tir ang che“ ti a urhsun taka khuangpui nen meuhva Pathian hnena memorandum thehluttu kan zoramah ruah han sur hlek se, TV ah leh Chanchinbu ah ruahsur vanga chhiatna hrang hrang hmuh tur a awm deuh reng mai le! Kan dilna Pathianin a taka min han chhan meuh chuan, chhei le!Leimin, lei tlahniam, luah ngam loh khawpa In che, In chhe tep, In tlu sawp nil nial, in tlusawp vek, road block a awm fer fur ta mai leh tuihawk leh chirh a luang zeih zuih na, hmeithai in tia tia lungtum thar lam tak tak kawngchhak atangin an rawn thu chhuak leh hlawl mai bawk. Chhungkaw pa ber a awm hle hle thei lova, nu ber a thlaphanga, fanau te thlamuang takin an awm thei bawk hek lo. Hetihlaiin chhiatna zarah hmingthatna leh chawimawina Politician ten an khum thung lawi si!

Tunlaia vanduaina thlentu lei min te hi dan naranin kawngpui bul hnai a mi te, hmun awih leh lei nghet lova insak leh kawnpui siamna hmunah te ni tlangpui thin. Kawngpuiah lirthei te ber atanga full load truck rit tak tak phur ahan tlan rik rum rum hi chuan a sawhnghawr chu na ve tak tur a ni. Lei chhungrilah leikhi a siam a, hetah hian tui a luh phawt chuan lei chu tawlh lo thei a ni lo reng a ni. Kan Zawlkhawpui kawngpuite dim bak sak lova nitin motorin a sawi nghing dur dur reng takah chuan, Kawngpui hnaivai leilungin a dawl ta si lova, hlauhawm tak an ni deuh vek mai. Sazu tak ngial tan pawh thin thi a ruahbuk han sual ngamna hmun takngial pawh a awm ta lo a ni ber e.

Tuidawn mumal tak siam leh in leh avela tuiluankawr siam hi thil harsa em em niin alang lo, zan lama Vanapa hall kawt vela hmeichhe inzuar taxi driver nena an indawr hmuh tur a zing tluk zet hian vawiin thleng hian ruahsur apianga a rem rema tuiluang ta mai mai hi hmuh peih phawt chuan hmuh tur a tam thin khawp mai. Helamah hian fimkhur deuh ila chu vanduaina thenkhat te hi chu kan pumpelh theih a va rinawm em!

Leihipna Gravitational force hian rihna nei tawh phawt chu hnuai lamah a hip ngar ngar thin avang hian Building te, mihring te, lirthei te reng reng rihna hi hmun khatah a inhlawmkhawm a, helai hmun hi Centre of Gravity (CG) tih a ni.  Helaiah hian leihipna pawh a nasa em em bik. Civil construction reng rengah CG hi sawm zinga pakhat Pathian hnena pek tluk zeta ngaih pawimawh a ni thin. CG hi dik taka a awm chuan Building rihna te hi hlawmkhatah awmin a tul ang zelin rualkhai takin leihnuailamah a in sem daihzaih thin. Tichuan, a rei tial tiala a nghet tulh tulh mai a ni. Hetihlai hian CG awmna a dik loh chuan balance a buai a, siamrem turin a in elh kikawi vak vak thin a, lirnghing, ruahsur, thli tleh avangin awlsam tein eng thil pawh a tawlh emaw, a tlu mai thin.

Vawikhat lei a min vak tawh chuan awih panga lei leh building hian Center of gravity a neih dik theih tawh loh avangin building rit lutuk sak loh hi a him ber. A kiang vel kilometer khat lai huam chhunga lei lung rihna force kal a tih danglam theih avangin a bik takin leimin awmna chhak lawkah building a awmphei chuan building center of gravity a tichhe theia, vawi leh khatah tawlh thut lo mahse, leichhungril-ah zawi zawiin a tawlh hret hreta a lo rei zela, lei a lo khi a, ruah tui a lo luanglut a, a tawpah phei chuan chhiatna a thlen thei thin. Keimahni fimkhur loh vangin kan thenawm khawveng dinhmun hlauhawmah kan din tir fo mai hi fimkhur tlan chu angai hle mai.

Newton First law of Motion ah chuan, “Thil che laiin chet reng a tuma, thil awm mai maiin awmna ngaia awm reng a tum , tih a ni. Leilung hian Inrinni zinga talh tur vawk leh bawng angin phuartu a nei lova, BPL compound atanga VIP compound a insawn tumin a tal a tal bawk hek lo. Leihipna tha avangin lungawi takin a awmna ngaiah a bawk hle hle zawk thin. Newton law of motion danah chuan leilung hi awm hle hle tur anih ber chu. Keini mihring te hian leilung awm tha hle hle lai kan tidanglama, leimin chhan tam tak hi vanduai vang hrim hrim chu thuhran nise,a bik takin Aizawl han bihchian hian a mawhphurtu ber chu keini a chhunga cheng mihring te hi kan ni zawk fo thin.