ZALEN January 8, 2025 : Mizoram sawrkar-a Social Welfare, Tribal Affairs, Women & Child Development Department -in thuchhuah a siam anga, Mizoram Sawrkarin ruang phurhna sensô a tum tur chu ZPM Thalai Headquarters chuan lawmawm an ti a, Minister Lalrinpuii hmalakna an chhuang tih thuchhuah an siamh an tarlang.

ZPM Thalai chuan, Mirethei leh harsa zawkte tana ruang phurhna tur sensô hi thil hautak a ni thin a. He harsatna tiziaawm tura Sawrkarin ruahmanna fel tak siama chhiat tawk chhungkuate harsatna sutkian na tura ruang phurh man chungchanga sawrkarin a ruahman mumal leh fel tak a siam ta chu lawmawm an ti. "Mizoram sawrkar chuan Mizoram Private Ambulance Association (MPAA) te nena thawk dunin, chhiat tawk chhungte tan Sum sen ngai tawh lova ruahmanna fel tak hnuaiah MPAA kaltlangin sawrkarin ruang phurhna tur Motor te chu a mamawhte tan a pe tawh mai dawn a ni," an ti.

ZPM Thalai Hqrs chuan, "He ruahmanna hi a hlawhtlin theihna tura Health Minister Lalrinpuii hmalakna leh thawhrimna te, Chief Minister Lalduhoma kaihhruai Sawrkar remhriatna te, Finance Department a thawktute leh Health Department a thawktute zawng zawng inpekna leh thawhrimnate hi chhuanawm a tiin, mirethei leh harsa zawkte ban phak Sawrkar a lo piang ta hi lawmawm kan ti takzet a ni," an ti bawk.