Tinreng

Ruihhlo a hluar

Admin - Mar 21, 2021

Myanmar buaina avangin Heroin man tlahniam

Tun hnaia damdawi hmangsualtu 'drugs addict' ten ruihna ber atana an hman heroin chu tunlai hian a hluar thar hle a, a man pawh tlemin a hniam deuh niin an sawi.

Excise & Narcotics department thawktu te chuan heroin hi ni dang ai chuan a hluar deuh ngei nia an hriat thu an sawi a, hei hi a chhan chu a ti thar an tam vang nia an hriat thu an sawi. Excise & Narcotics department thawktu te chuan, "Heroin ti thar hi Aizawl khawpui ah hi chuan an pung nasa lem lo a, mahse tunhma lama buaipui ve ngai lo thing-tlang lama thalai then-khat ten an buaipui ve tak nia a lan avang hian a hluar thar niin kan hria," an ti. Tunlaia heroin Mizoramah a tam chhan chu thenawm ram Myanmar ah buaina a thlen vang nia an hriat thu sawiin, "Myanmar ah sawrkar a mumal loh avangin drugs a sumdawng te tan chance a tha a, rorelna a mumal loh avangin drugs a sumdawng te tan kawng a inhawng zau sawt a ni," an ti.

Heroin chu Aizawl ah hawng khat Rs. 35,000 vel nia sawiin Excise & Narcotics department thawk te chuan damdawi lo luhna ber Tiau ah chuan hawng khat hi Rs. 18,000 te a ni tih an sawi a. Mi thenkhat chuan Rs. 15,000 ten an chah thei nia sawin a hlep a that avangin mi thenkhat chuan risk la in an phur thin tih an sawi bawk.

Aizawl a damdawi ti thin pakhat chuan heroin chu mi nazawng tan chuan hmuh har deuh mah se, an tan chuan hmuh a harsa lemlo niin Zalen a hrilh a. Aizawl ah chuan dam-dawi ti thar chu an awm lemloh thu sawiin drugs man pawh ni dang aia a to lemloh thu a sawi bawk.

Excise & Narcotics department chhinchhiah danin kum 1984 atanga March ni 19, 2021 thleng khan Mizoramah damdawi hmansual vang hian mi 1,659 an thi tawh a, heng zinga 1,464 hi mipa niin hmeichhia 195 an awm bawk. Chhinchhiahna atanga a lan danin drugs ti thinten an thihpui tam ber chu proxyvon /parvon spas a ni a, hemi avanga thi hi 1,161 an awm tawh a. Heroin vanga thi 214 leh thil dang dang tihpawlh vanga thi 284 an awm bawk.

Kumin 2021 bikah damdawi hmansual vanga thi hi Mizoramah 13 an awm tawh a, an zinga 11 chu mipa niin hmeichhia 2 an awm bawk a. Heroin vanga thi 13 awmin a dang 1 hi heroin leh thildang tihpawlh a ni.