Aizawl: Nikum 2021 chhung khan Mizoramah ruihhlo hman sual vangin mi 47 an thi a, tun hnai kum ruk kalta chhunga an thih tlem ber kum a ni. Hetih lai hian Excise & Narcotics department ten heroin an man erawh a kum telin a pung chho zel thung.

Excise & Narcotics Department chhinchhiah danin nikum chhunga damdawi hman sual vanga thi 47 zinga 39 hi mipa an ni a, pariat chu hmeichhia an ni. Ruihhlo vanga thite thihpui tam ber hi heroin a ni a, thi zinga 46 hi heroin vanga thi an niin a dang pakhat hi alprozolam vanga thi a ni.

Chhinchhiah danin Mizoramah damdawi hman sual vanga thi mi 1,693 an awm tawh a, an zinga 1,492 chu mipa an niin hmeichhia 201 an awm bawk. 

Damdawi hman sual vanga thihna thleng hi tun hnai kum ruk chhungin a sang hle a, kum 2020 khan damdawi hman sual vanga thihna thlen tam ber kum a ni a. Nikumah erawh thihna thleng hi tlahniamin kuminah chuan damdawi hman sual vanga thi chhinchhiah a la awm lo a ni.

Excise & Narcotics Department hian tun hnaiah heroin an man tam chho hle a, heng damdawi an mante hi a tlangpuiin khawchhak lam, Myanmar atanga lokal an ni. 

END hian kum 2016 khan heroin kgs. 4.039, 2017-ah kgs 6.186, 2018-ah kgs 8.716, 2019-ah kgs 12.596, 2020-ah kgs 11.710 leh nikum 2021 khan kgs 18.906 an man a ni. 

END hotute chuan Mizoram chu drugs kalkawng a la ni reng nia sawiin tuna an man bak hi Mizoram kaltlanga tawlh ruk leh man loh a tam an rin thu an sawi a. 

Hetih lai hian khawthlang lama an buaipui methamphetamine ti erawh Mizo thalaite zingah an la awm lo nia an hriat thu an sawi.

Kum 6 chhunga damdawi hmansual vanga thihna thlen dan

Kum     Mipa    Hmeichhia    Total
2016    50                  9          59    
2017    53                12          65
2018    44                12          56
2019    42                13          55
2020    61                6            67
2021    39                8            47