Aizawl: Mizoramah kum 1984 atanga January 10, 2019 thleng khan ruihhlo kaihhnawiha thi mi 1525 an awm tawh a. Nikum 2018-ah ruihhlo kaihhnawiha thi hi 56 awmin kuminah 1 an awm tawh.   Excise & Narcotics Department chhinchhiah danin nikum 2018 chhunga ruihhlo kaihhnawiha thi 56 zinga 46 hi mipa niin 10 chu hmeichhia an ni a. Ruihhlo thihpui zinga 17-te hi heroin vanga thi an ni a, a dang 39 hi heroin leh thil dang tihpawlh an ni.   Kumin January 10 thleng khan Mizoramah ruihhlo kaihhnawiha thi hi mipa pakhat a awm tawh a, hei pawh hi damdawi chi hrang hrang tihpawlh a ni.   Excise & Narcotics Department chhinchhiah dan chuan Mizoramah ruihhlo vanga thi 1525 zinga a tam zawk, 1353 hi mipa an ni a, a dang 172 hi hmeichhia an ni. Ruihhlo ti thinte thihpui tam ber hi Proxyvon/Parvon Spas a ni a, he damdawi vang hian mi 1161 an thi a, heroin vanga thi 188 in a dawt a, a dang 176 hi damdawi chi hrang hrang tihpawlh te an ni.   Kum 1984 kum 2012 thleng khan damdawi hmangsualtuten Proxyvon/Parvon Spas hi an thihpui nasa hle a, kum 2013 atang khan heroin chu an thihpui langsar a ni tan a. Kum 2017 atang chuan Proxyvon/Parvon Spas vanga thi chhinchhiah an awm tawh lo a, heroin chu an thihpui tam ber.