Aizawl December 15, 2022: Chief Minister Zoramthanga hovin vawiin khan CM Conference Hall-ah 'Ruihhlo leh Kuhva' chungchang sawiin an thukhawm. Dy. Chief Minister Tawnluia leh Home leh sawrkar dept. dangte leh CYMA hotute an tel a, dan lova Kuhva leh ruihhlo do na kawngah Police an indaih loh avangin YMA leh NGO te sawm ni se an ti. 

Meeting-ah hian dan lova kuhva tawlh leh, chumi avanga Mizoram chhunga kuhva hring chingtute harsatna tawh te, tunhnaia CYMA leh Mizoram Police hmalakna te ngaihthlak a sawiho a ni a. Ruihhlo do chungchanga hmalakna te leh harsatna tawh te sawiho a ni bawk.

CM ho a thutkhawmnaa an rorel ang chuan Dan lo a Kuhva ro leh ruihhlo lut te chu dan kalh an nih avangin theihtawp chhuaha man vek tur a ni. Hemi atan hian Police an indaih tawk loh avangin anmahni pui turin YMA leh NGO member dangte pawh a tul anga sawm a, thawhho zel ni se tih a ni.

Chak zawka hmalak theih nan Task Force tha tak din ni se, an ti a, Home Department atangin mawhphurtu engemawzat insiamin, NGO atangin tel bawk se, A tul a nih chuan department dang atang pawhin telh ni se, tih a ni bawk.

Check gate leh duty posts a tam thei ang ber siam rawt a ni a, a awm sa bakah a tul angin gate siam belhin, uluk taka vil ni se. Chutah chuan Police te leh NGO te leh a tul angin Assam Rifles emaw BSF emaw pawh thawhhopui thei turin co-ordination tha tak neiin kalpui ni se, tih a ni.

CYMA in ruihhlo do beihpui a thlak mekah a remchan dan ang zelin sawrkar pawhin suma puih ni se tiin meeting-ah hian sawi a ni bawk.