ZALEN September 08, 2026 : September ni 1, 2026 khan Gauhati High Court chuan ruihhlo man thubuaia kum 10 lung in tang tur leh Rs. 1,00,000/- chawi tur a Special Judge, NDPS Court, Champhai-in hremna a pek tawh chu a thiat a, he thubuaiah hian thiam a chantir.

April ni 26, 2023 khan Tuisenphai Check Gate-ah Police-te chuan Hyundai i20 pakhat an endik a, car hnung atangin sahbawn bawm 80 chuang a dah, heroin 894.18 grams chu an man. He thubuai hi Lalrosanga leh Joseph Laldingngheta te chungah chargesheet thehlutin trial neih a ni.

October ni 18, 2024 khan Special Judge, NDPS Court, Champhai chuan Lalrosanga chu NDPS Act Section 21(c) leh 25 hnuaiah thiam loh a chantir a, kum 10 lung in tang tur leh Rs. 1,00,000/- chawi turin a hrem.

He thutlukna hi Lalrosanga chuan Gauhati High Court-ah appeal a thlen hnuah, Justice Kaushik Goswami chuan prosecution-in ruihhlo hi Lalrosanga hnen atanga man a ni tih finfiahna tawk tak an neih loh avangin trial court thutlukna chu a thiat a, Lalrosanga chu thiam a chantir.

High Court chuan finfiahna awm zawng zawng te uluk taka a enfiah hnuin, prosecution case chu thiamloh chantirna turin a a chak tawk loh thu an sawi a, ruihhlo chu Lalrosanga hnen atanga man a ni lo va, ruihhlo manna a independent witness chuan thubuai thehluttuin ruihhlo a keng lai leh motor chhunga ruihhlo a dah lai a hmu lo va. Investigating Officer pawhin motor chhunga heroin a dah lai a hmuh loh thu a sawi bawk.

Court chuan ruihhlo manna a witness dang, constable pakhat chu witness anga koh a ni lo tih a hmu a, thubuai thehluttu leh an ruihhlo mante hian inzawmna an nei ngei a ni tih finfiah theitu witness awmchhun chu PW-4 a ni a, witness ngei pawh hian thubuai thehluttu chu motor pawna a awm laia tih din a nih tawh laiin, ruihhlo chu motor hnunga a dah dan a sawi thei lo a bawk, IO chuan motor-in check gate a paltlang lai hian heroin chu motor chhungah a awm lo a ni tih a pawm bawk.

High Court chuan Trial Court-in thubuai thehluttu leh rinhlelh dang mi pakhat thiamloh a chantirna chu ruihhlo an hmuhna motor-a chuang an nih vang chauh niin a lan thu a hmu a, High Court chuan chu ringawt chu ruihhlo neitu ngei an ni tih finfiahna atan a tling tawk loh thu an sawi a. 

Court chuan prosecution lamin an puhna lian tak chu Section 313 examination-ah zawh a nih loh thu a hmu a. An puhna lian tak chungchanga insawifiah theihna hun pek a nih loh vang hian, thiam loh chantirna atan a hman theih loh thu Court chuan a sawi a ni (www.jclalnunsanga.in)