DOWNLOAD OUR APP

Read latest news on your phone
app-store

Ruihhlo Ngaih leh kan Enkawl dan Bihchianna

Mar 14, 2015

Ruihhlo Ngaih leh kan Enkawl dan Bihchianna

- Lalremruati, Clinical Psychologist Ruihhlo han tih hian Zu leh Drugs (Damdawi) te hi a huam vek a. Zu hi hmanlai pipute atanga Mizoten rual pawl nan leh intihhlimna atana kan lo hman ve ber a ni a. Kristianna hian zu kan ngaihdan a rawn sawi danglam dawrh a, tun hnuah phei chuan MLTP Act te pawh kan lo nei ta hial a ni. Amaherawhchu zu chu vawiin ni thlengin kan tirem tak tak thei chuang lo va, chutiang bawkin ruihhlo dang, damdawi chi hrang hrang pawhin hluar lam a la pan ta zel niin a lang. Ruihhlo hmansual chungchang hi mitinin kan hre deuh vek tawh ang a. A kaihhnawih harsatna leh a nghawng chungchang pawh chhungkaw tam takin kan tuar mek a ni. Ruihhlo hman sual leh ngawlveina chungchanga invenna leh inenkawlna kawngah hian tha leh zung, sum leh pai tam tak a luang ral tawh bawk a ni. Mi mal, chhungkua, khawtlang leh ram hmasawnna tithuanawptu lian tham tak a tling a, thalai tam tak ei leh bar zawnna kawng tipingtu a ni bawk. Hun lo kal zel tura kan ram innghahna tur lungphum hi sawi nghinin a awm mek a ni. Ruihhlo hmansualna kawnga invenna, inzirtirna leh inenkawlna chungchangah hian loh theih lohvin mi tam tak inhnamhnawih a lo ngai ta a, mi thahnemngai tam takte inpekna leh thawhrim rah pawh kan seng ve mek bawk a ni. Amaherawhchu, kan harsatna sukiang tur hian kan hmabak erawh a la ko hle thung. Department of Psychology, Mizoram University leh Alumni Association of Psychology, Mizoram University tangkawpin March ni 10, 2015 khan ruihhlo nghaih leh a enkawl chungchang zirhona leh inrawnkhawmna hun neiin, ‘One Day International Workshop on Addiction and Rehabilitation’ a buatsaih a. Hemi tuma thupui sawi hawngtu atan hian Pi Remmawii Kristjanson (Pi Bawihtei), LCSW & Master Addiction Counsellor, USA sawm a ni a. Ani hian Atlanta, Georgia, USA ah Ruihhlo ngaite enkawlna hmun, Red Lotus Recovery Centre a din a, kum 10 chuang a lo enkawl tawh a ni. Pi Bawihtei’n hun a hman hian Serenity Prayer (Thlamuan dil tawngtaina)-in bul tan a ni. THLAMUAN DIL TAWNGTAINA Lalpa, ka tihdanglam theih loh thilte pawm thiam thei turin thlamuanna min pe la, Ka tihdanglam theihte erawh chu tidanglam ngam turin huaisenna min pe ang che; Tin, heng thil pahnihte danglamna thliar hrang thei tur hian finna min pe bawk ang che. AMEN Ani hian ruihhlo chungchang leh USA-a ruihhlo ngai an enkawl dan kalphung sawiin, an hlawhtlinna kawngte Mizorama kalpui ve theih a chak thu leh thawhpui tura a inhuam thu te pawh a sawi a. An centre-a enkawlna an kalpui ber Alcoholic Anonymous (AA), [Ngawlveiten an hming leh an nihna te vawng him chunga, zalen taka an harsatna an sawi khawmna hmun] chungchang a sawi a, hemi atana an hman ber Rahbi Sawmpahnih (12 Steps) leh Thuro inchhiah chhawn Sawmpahnih (12 Traditions) te a tarlang bawk (Heng hi Mizoram Social Defence & Rehabilitation Board nen thawk hovin Mizotawnga lehlin tawh a ni). AA hi kum 20 kalta atang khan Mizoramah kalpui tumin NGO hrang hrang te nen bul a lo tan tawh a, amaherawhchu vawiin ni thleng hian a la hlawhtling hlei thei lova, AA hi khawvel hmun hrang hrangah hlawhtling taka kalpui theih a nih laia eng vanga Mizote zinga hlawhtling thei lo bik nge a nih tih hi zawhna lian tak a ni ta a ni. Tin ruihhlo ngai enkawlna hian hun rei tak, a kuma kum a awh dan leh, kar hnih khat chhung leka enkawl dam thut theih mai a nih lo thu te a sawi bawk. Tin, ruihhlo ngai enkawlnaah hian anmahni duhthlanna leh mawhphurhna pawimawh zia uar taka sawiin, damna kalkawng an zawh tura duh an thlan tir dan leh mawhphurhna an pek let thin dan a sawi bawk. Hemi ni vek hian sawihona hun (Panel discussion) neih a ni a, hetah hian Ruihhlo ngaih leh a enkawl chungchanga Mizoram dinhmun, helama mithiam Mizorama hma la nasa ber tu te - kan psychiatrists te, psychologists te, home enkawltute, doctor te, kohhran lam mi te, dan hremi te, police lam te, social welfare lam leh researchers ten enkawlna kawnga hmalak dan leh taksa, rilru leh thlarau damna a pawimawh zia te, dan leh hrai chungchang, Kohhran pawimawhna leh a mawhphurhna te thlengin sawiho a ni. He sawihonaah hian ngaihdan inkawlkalh te pawh a awm a, abikin ngawlveina kan hrilhfiah dan chungchangah leh a enkawl dan chungchangah. Thenkhatin ngawlveina hi tihdam theih a ni lo an tih laiin, thenkhat erawh chuan enkawl theih leh dam thei chin te pawh awm niin an ngai thung. Ruihhlo ngaih hi natna nge sual tihte pawh sawiho a ni a, kan hrilhfiah danin a enkawl dan a hril si thin avangin. Pi Bawihtei pawhin hemi chungchang hi sawi zauna neiin thil um nen a tehkhin a; thil kan umin, a um hma leh um hnu hmel leh a nihna a inthlak danglam ang hian, ngawlveinain a tlakbuak mihring chu ngawlvei hma dinhmun ang chiahah a kir leh thei tawh ngai lo a ni tih a sawi. Hemi bakah hian kum bithliah fel tak neia ruihhlo chungchanga inzirtirna (Awareness) leh inenkawlna pawimawhna te, a hun leh a hmun mila thuchah leh tawngkam hman fimkhur tulna te, hmeichhia, mipa leh naupang mamawh inan loh dan ang zela enkawl dan a thuhmun vek theih loh zia te sawi ho a ni. Ruihhlo ngai enkawlna kawngah hian ram pawn atangin mithiam tam tak ten tihdan leh kalphung thar tha zawk min rawn kawhhmuh tawh thin a, engemaw chen kan han kalpui ve thin tak na a, a tawpah kan tihdan ngaiah bawk kan let leh fo thin a, hei hian kan hmasawnna a tihnufum thin a ni lo maw? Kan hnam nunphung kan thlir chuan mizote hi a huhova hun hmang tam, khawtlanga nunho nuam ti hnam kan ni a, hei hian kawng tamtakah thatna a neih laiin, mimal hmasawnna tur tam tak a tithuanawp thei niin a lang thung. Khawvel hmun dang kan thlir chuan mimal nun a pawimawh a, Mizote ang lo takin a huhova thil ti dual dual lovin mimal duhthlanna an ngaipawimawh a, chu chuan ruihhlo ngawlvei leh enkawlna kawngah pawh kawngro thui tak a su niin a hriat theih. Hei vang hi a ni thei ang em ram danga hlawhtling taka an kalpui AA te pawh kan ramah a hlawhtlin hleih theih loh? Kan ram hian ruihhlo ngai enkawlna kawngah pawh hian hmasawnna tur kawng thui tak zawh hmabak kan la nei a, Ram dang tih dan thlir chungin, a zawng a zaa entawn ngawr ngawr lovin, kan hnam nunphung leh ziarang mila enkawlna kalphung bulfuk deuh zawk kan ngaihtuah chhuah te pawh hi a hun ta viau niin a lang.
Share now