Aizawl: Mizoramah kumin thla hnih chhungin ruihhlo (heroin) vanga thi mi 21 an awm a, chu chu nikum chhunga ruihhlo vanga thi zahve deuh thaw a ni.

Excise & Narcotics Department (END) chhinchhiah danin, Mizoramah kumin March 2 thleng khan ruihhlo vanga thi mipa 19 leh hmeichhia pahnih an awm a, an vaiin heroin vanga thi an ni. 

Kumina ruihhlo vanga thi chhinchhiah 21 hi nikum 2022 chhunga thi mi 43 zahve a tling nghal thuak a, hetiang ang renga ruihhlo thihpui an tam zel chuan kumin hi ruihhlo vanga thihna thlen tam ber pawl kum a ni thei dawn. 

Kum 1984 atanga chhutin Mizoramah ruihhlo vanga thi mi 1,757 an awm tawh a, chung mite chu mipa 1,548 leh hmeichhia 209 an ni.

Hetihlai hian tun hnai chhoah nasa takin heroin a hluar a, nikum chhung khan END-ten kg 35.137 an man a, Mizorama heroin man tam ber kum ni hial a hriat a ni.

Kumin ringawtah pawh heroin hi END bakah, police leh Central YMA hnuai a ruihhlo do pawl, CADS ten thahnem tak an man leh tawh bawk.