ZALEN, Apr. 05, 2025: Zirtawpni khan Mizoram University (MZU) event hlawhtling tak — Virthli — chu khar a ni a. A khar nan Runway Showdown hmuhnawm tak buatsaih a ni a, hetah hian show stopper-ah Urfi Javed a inlan.

Mizo designer hlawhtling ber zinga mi, Escape Engmawia’n kumin Virthli Runway Showdown-ah a kutchhuak mawi tak takte chu Mizo model langsar tak takte hmangin a pho chhuak a. Kum dangah show stopper atan hian Mizo model-te bakah Indian model lar tak takte a hmang thin a. Kuminah erawh model pawh ni lem lo a rawn hmang tlat.

Kumin Runway Showdown-ah hian, Escape Engmawia hian Femina Miss India lam thlang lovin Indian internet personality leh television actress hriat hlawh tak, Urfi Javed a sawm chhuak a. Ani hi hnehsawh takin show stopper-ah a rawn tang. Mipui lawm a hlawh hle.

Mipui rinlawk loh deuhin Runway Showdown-ah hian Mimi Renthlei-in entu a barakhaih! A rawn inlan thut. Model hovin ramp an zawh laiin ‘Ruati Tunge I Ngaihzawng?’ a perform, a la hnehsawh hle.