Aizawl February 28, 2024 : Mizo Zirlai Pawl (MZP) General Headquarters, Aizawl Executive Committee meeting vawi 628-na chu vawiin khan MZP Conference Hall-ah an thukhawm a, Rashtriya Uchchatar Shiksha Abhiyan (RUSA) hnuaia Mizoram chhunga college building sak mek leh Mizoram Education Service (MES) chungchang bakah pawl chhung thil pawimawh te an rel.

Meeting hi MZP President H. Lalthianghlima'n a kaihruai a, RUSA hnuaia Mizoram chhunga college hrang hrang building sak mek chu a tul anga endik nise a ti a, college building hrang hrang sak mek chu, a nih dan tur ang a nih leg nih loh bakah, zirlaite’n a hun taka an luah luh theih nan a tul anga hmalak nise tiin a rel a ni.

Meeting chuan, MZP ten hun rei tak hma a lo lak tawh leh vei em em Mizoram zirna enkawtu tur Mizoram Education Service (MES) chu, Mizoram-in kan neih ngei theih nan hmalak nise a ti bawk.