Russian missile leh drone hmanga a kahnaah Ukraine-a energy system zahve dawn chu hman theih lohvin a awm phah niin prime minister chuan a sawi.

An khawpui, Kyiv-ah khua vawt tanin vur khang theih khawp a ni mek a, thlasik lo thleng mekah a vawi khat nan vur a tla tan bawk.

Kyiv-a thuneitu pakhat chuan khawpui hian power grid tihthih vek a ngai mai thei niin a sawi.

President Volodymyr Zelensky chuan a hmain Ukrainian maktaduai 10 zetin power an nei lo mek tih a lo sawi tawh.

Zirtawpni zana video hmanga thu a sawiah Zelensky chuan ‘khawpuia region 17 chuan energy supply-ah harsatna an tawk’ niin a sawi a, emergency shutdown erawh a ngaih vak loh thu leh energy industry-a thawktuten a chhia siam tuma an buai hle thu a sawi.

“Vanduaithlak takin Russia hian missile-in Ukraine civil mi leh hmun pawimawh an kap nasa a. Kan energy system zahve dawn chu a hman theih loh,” tiin Prime Minister Denys Shmyhal chuan Zirtawpnia thuthar lakhawmtute a kawmnaah a sawi.

Kyiv khawpui enkawlnaa deputy head Mykola Povoroznyk pawhin ‘khawpui hian shutdown vek a tawng thei’ niin a sawi bawk.

Grid tihthih vek chuan harsatna a thlen dawn em hriat a ni lo va; mahse, thuneitute chuan khawi khawpui atang maha inthiar chhuah ngai an ti lo.

Ukraine-a national grid operator Ukrenergo chuan Telegram-ah, “Min beitute hian kan energy hmunpuite bitumin Ukrainian-te hi electric leh intihlumna nei lova siam min tum a ni,” an ti.

Ukraine-a private energy company lian ber, DTEK-a an CEO, Maksym Tymchenko chuan an dinhmun chu a khirh sawt hle tih a sawi.

“Vanduaithlak takin min rawn beih apiang hian energy kan nei tlem sawtin innghahna kan nei chau sawt sawt zel a, chu chu thil tak tak a ni,” a ti.

Ruahman lawk leh ruahman lawk leh lohva current  awm loh chu Ukraine hmun tam takah chuan awmphung pangngai a ni tan mek.