ZALEN, February 02, 2025: K. Ramzauva chuan Agra, Uttar Pradesh-a Yonex-Sunrise All India Masters Ranking Badminton Tournament 2026-ah mipa kum 60 chung lam inelna huanga maltanah silver medal a vaw chhuak.

Khatla veng, Aizawla cheng, Rza’n final a luhna inelna hi Nilaini atanga khelh tan kha niin Pathianni khan khelh zawh a ni. 

Rza hi Seeded No. 2 ni chungin tournament a hmachhawn a. Round hmasa lam a awm hnuah round of 32 atanga bul a tan a, Achimi Yekhuvi lakah 21-19, 21-18-in hnehna a chang a, round of 16 a lut.

Round of 16-ah hian Atul Walia nen inhmachhawnin game hmasaah inhnehtawk hle mah se game hnihn erawh awlsam taka lain 27-25, 21-11-a chakin a thiam pariat zingah a tel.

Quarterfinal-ah hian Pavalavannan B. nen inhmachhawn lehin harsatna tawk lovin 21-12, 21-13 a chak zui a, a thiam pali zingah a tel zui leh. 

Semifinal-ah hian Sandeep Vij nen inhmachhawnin game hmasa ber lain game hnihnaah a hloh va, deciding game-ah insiam tha lehnghalin 22-20, 17-21, 21-14-a chakin final a lut.

Final-ah hian Seeded No. 1 Ram Lakhan nen inhmachhawnin an inbei tawk hle a, deciding game khelh ngai tho niin a tawpah 18-21, 22-20, 5-21-in a tlawm a, silver medal a dawng ta a ni. 

Mizoram Badminton Association (MBA) chuan India ram pum inelna liana Mizoram tihmingthatu hi a chhuangin a hlawhtlinnaah a lawmpui tak meuh tih an sawi a. Hlawhtlinna sang zawk chang zel tur leh Mizoram tihmingthatu ni zel turin duhsakna an hlan tih an sawi.