Aizawl : Mizoram sawrkar hnuaia Commerce & Industry Department chuan hun reilo te atangin thlai leh sa man mumal zawka a kal theihna turin bithliah mekin, hun rei lo te chhungin hei hi kalpui an tum tih ZALEN an hrilh.

Commerce & Industry lam hian hun eng emaw chen atang khan thlai man hi New Market bik atan a lo bithliah thin a, hei hi NGO-te nen a man awm ang vel tura an chhut anga an kalpui thin a ni a, an department website leh I&PR website kaltlangin thingtlang lam atanga thlai rawn lut leh phai lam atanga thlai rawn lutte hi a man tur chhutin an bithliah thin.

ZALEN-in Commerce & Industry-a Marketing Officer T. Lalthangkima hnen atanga thu a dawn danin ruahmanna an siam tharah chuan, Agriculture, Horticulture leh Vety lam atangin thlai leh sa man tur hi an rawn duang ang a, chumi atang chuan kuthnathawktu (farmer)-ten an hlawkpui theih ber dan tur leh a zuar chhuakte pawhin an hlawkpui theih turin sa leh thlai man hi an bithliah sak tawh dawn a ni.