Kum tina sem thin Screen Actors Guild (SAG) Award chu a vawi 28 nan sem a ni leh dawn ta. SAG Award hi film leh television lama inlante tana buatsaih niin, vawiin Pathianni hian Barker Hangar, Santa Monica, California-ah sem a ni ang - India-ah chuan Thawhtanni zing lamah en theih a ni ang.  

Award ceremony hi TNT leh TBS-ahte live-a pekchhuah a ni dawn a, January khan Rosario Dawson leh Vanessa Hudgens te chuan award dawng thei tura chhawpchhuahte hming Instagram Live kaltlangin an lo puang tawh a ni. Kumin hian CODA leh Squid Game te chu chawimawina dawng tura rinkai leh langsar an ni. Squid Game hi Drama Series huangah Outstanding Performance dawng thei tura chhawpchhuah niin, English series ni lo zinga hetiang dinhmun luah thei hmasa ber leh, Korean series zinga hetiang dinhmua inhlangkai thei hmasa ber a ni. 

Squid Game star Lee Jung-jae chu Asian mipa zinga nomination hmu thei hmsa ber niin, HoYeon Jung chu Asian hmeichhe zinga award dawng thei tura chhawpchhuah zinga lang thei pahnihna a ni bawk. SAG Award 2022-ah hian - Lady Gaga, Leonardo DiCaprio leh Will Smith te chu inlan tur zingah an tel a, a boruak a lian dawn.