April 25, 2024; Aizawl Sahuan atanga Savawm chhuak chu kah a nih rinna a awm a, Sairang Police Station ah pawh FIR thehluh a ni. Hetihlai hian Savawm hnu hi ngawrh taka chhui zui zel a la ni. 

Deputy Conservator of Forest, Aizawl Wildlife Division &

Director, Aizawl Zoological Park in vawiin a thuchhuah a siam a tarlan a nih danin, 22.4.2024 khan nilengin Savawm hnu chhui a ni a, tlai dar 5:30 a Savawm hnu an chhui tawpna ramah Savawm thang (trap) kam tum a staff te an inbuatsaih mek lai in mau hmun ah thisen bua hmuh a ni a, a sirah hnang hlai nate hmuh niin Savawm hi kah a nih rinna lian tak neih a ni

Hemi zan vek hian staff te chuan thisen an hmuhna lai ram hi kal khan hrang hrang ah changin tlaivarin an hual a, staff thenkhatin a chhungah luhchilhin an dap chhuak nghal vek bawk. Hetihlai hian sa emaw a sa channa ni awm engmah hnuhma emaw hmuh a ni lo a, mihring rinhleh tur pawh tumah man chhuah an ni lo. Hemi chungchangah hian Sairang Police Station ah FIR thehluh a ni tawh a ni.

Pawikhawihna hmuna thisen hmuhte hi MZU Bio-tech Laboratory-ah finfiah tura pek tawh a ni a, mau a thisen kai hi mihring kut atanga kai nia rinhlelh a ni a, hei avang hian Forensic Science Laboratory lamah Finger Print Analysis tih nghal a ni bawk.

Hengte a nih avang hian savawm hnu hi staff ten ngawrh takin an la chhui zui zel a, DNA test result nghah mek hi a result a zirin hma lak dan tur rel thar leh tur a ni.

Sahuan atanga savawm chhuak hi a thawm hria emaw lo hmu an awm a nih chuan a rang lama Forest Department Officials te hriattir turin mipuite ngen nawn leh an ni a. Wildlife (Protection) Act, 1972 hnuaiah Savawm te hi Schedule I ah dah an nih angin a lo kap emaw a sa lo chan an awm a nih chuan an chungah dan anga hma lak theih a ni. Lo tihlum emaw a sa lo chan an awm a nih chuan kum 3 atanga kum 7 thleng lungin tan theihna a ni.