June 3, 2023; Aizawl Sahuan a sakei 3 ten ni khat ah an ei ral chu Bawngsa kg 27 niin, kar khat ah ni 1 chaw nghei tir thin an ni. Ramsa chaw atan senso tam mah se sahuan changtlung leh tlawh tham tak buatsaih zel an tum tih forest minister TJ Lalnuntluanga chuan a sawi.

Vawiin MJA ten sahuan an tlawhna ah Aizawl Sahuan enkawltu Aizawl Zoo Director sawi danin, sahuan a ramsate tan hian ramsa chaw supplier awmin, open tender chhuah hnuah DPAB kaltlangin Zoo Feed supplier tur thlan thin a ni.

Supplier te hian department lamin thla khat chhunga ramsate ei tur mamawh zat feed requirement an siam an supply thin. A tlangpuiin thla khat chhung in ramsa leh sava ten Rs. 9,00,000 man hu vel an ei thin.
 
Keipui pathum te ni khatah sa kg 27 pek thin an ni a, chumi atan chuan kar khat ah Rs. 97,000 bawr vel sen thin a ni.

Aizawl sahuan ah hian exotic ramsa leh sava dan lova phurh an man te chu court thuchhuak angin dah luh thin an ni a, an ei tur te chu department in a supply thin. Exotic ramsa leh sava te hian thla khat chhungin Rs. 1,30,000 man hu vel an ei thin bawk.

Exotic ramsa sahuan a dah tawh zawng zawng zat chu 913 niin, 666 an thi tawh a, a la dam 213 enkawl mek an ni. Ramsa thi te hi postmortem zel thin an ni. 

Forest minister TJ Lalnuntluanga chuan sahuan chungchangah hmasawnna a awm zel tih sawiin, "Sahuan pangngai kan nei hi a lawmawm, a hmun zauhna turin hmalak mek a ni a, sakeibaknei dah thleng pawhin rilru ah a awm," a ti.