ZALEN Sept. 2, 2024; Saichal Village Council (VC) hmalaknain, an khua a zirtirtute luah tur In Rs. Nuai 12 chuang sengin sak a ni a, hawn mai theih a peih fel thawkhat a ni tawh.

Saichal VCP Zohmangaiha hnen atanga ZALEN thudawn danin, VC hmalaknain an khua-ah Development Committee din a ni a, chu committee hmalakna chuan an khua a kawngpui NH102 B laih mek a zangnadawmna la te atangin donation an dawng a, chung hmang leh an bialtu MLA (Lengteng) P&E minister F. Rodingliana hmalak puina-in an khua a zirtitute luah tur hi sak a ni.

An In sak hi July 2024 atang khan tanin Rs. Nuai 12 chuang an seng a, tunah hian hawn tura peihfel thawkhat a ni tawh. Donation atanga an hmuh bakah an bialtu MLA in a chung tur rangva bakah MLA fund atangin Rs. Nuai 1 a pe bawk.

Zirtirtute luah tur an sak hi a chhawng niin, a dung feet 48 leh a vang feet 21 a ni a, zirtirtu 4 luah theih tura ruahman a ni.

An In sakna hmun hi primary school compound niin, an khua-ah hian sawrkar school primary, middle leh high school a awm a, an In sak luah tur nghak zirtirtu pawh an awm mek tawh niin thudawnna Saichal VCP chuan a sawi.

"In luah tur a vang a, zirtirtu awm thar tur ten chhuanlamah an hmang thin a, chumi vang chuan hma i la teh ang u kan ti a, ruahmanna kan siam ta a ni, kan bialtu MLA in a hawn hunah luah theih a ni ang," tiin Saichal VCP chuan a sawi bawk.

Saichal khua hi Saitual district chhunga awm niin, Saitual chhak a awm a ni.