ZALEN Dec. 6. 2024; Ni 4.12.2024 thim hlim khan Saipum ah Thanghauva chuan Hentenchun (26), s/o Seikhawhau, Saipum Chhimvenga a thianpa te in a khawsa chu a kaphlum a, Thanghauva hi police ten an man zui nghal bawk.

Jangminlien s/o Pauchun Saipum Chhimveng chuan Vairengte police station-ah FIR a thehlut a, chuta tarlan a nih danin, Hentenchun hi Jangminlien thianpa niin, a in a khawsa a ni a, Hentenchun hi Nagaland lam mi niin inhlawh tura Mizoram rawn kal a nih thu a tarlang bawk.

Thanghauva hian ni 4.12.2024 tlai lam khan a fanu chu tirin Hentenchun hi an in a kal turin a koh tir a, Hentenchun hian an in a thlen rualin Ulhbun hmangin a nak vei lam pang-ah hmun leh hmunah a lo kap a, Hentenchun hi Saipum Health & Wellness Centre-ah hruai nghal niin a boral zui nghal niin a tarlang a, he tualthahna a mawhphurhtu lakah hian dan anga hmalak sak turin a ti bawk.

Silaia an inkahna chhan hi hriat chian ni chiah lo mahse, tualthattu hian a nupui hlui, Jangminlien nau leh a thah tak Hentenchun hi a ringhlel thin tih a sawi.

Tualthahna a thleng tih mipuiten an hriat veleh hian boruak a sosang hle a, mipui pungkhawm thinrim chuan Thanghauva te chenna in chu an suasam zui a, a in hi luahzui tlak lohin an siam sak a, tualthattu a puh hi police lam ten an lak hman avangin mipui kut erawh a tuar lo nia hriat a ni a, mipui lam hian tualthattu hi police te lak atanga lak let an tumna lamah mipui leh police lam te pawh an innawr nia hriat a ni a, boruak duh awm lo dang erawh a thleng zui lo nia hriat a ni bawk.

Hentenchun a ruang hi nimin khan Vairengte damdawiin (CHC) ah post mortem a ni a, nimin vek khan an khua Nagaland lam an panpui nghal nia thudawn a ni bawk.

Vairengte Police chuan tualthattu nia puh Thanghauva hi ni 4.12.2024 zan khan police station-ah an la nghal a, nimin khan Kolasib Court ah an thawn nghal bawk a ni. He tualthahna chungchangah hian Police te chuan u/s 103(1) BNS leh 25(1B)(a) Arms Act hmangin thubuai an ziaklut nghal a ni.