Aizawl, June 13: Rajya Sabha MP leh Food Corporation of India, State Consultative Comtt. chairman ni bawk K.Vanlalvena chuan Mizoram sawrkarin FCI tan office tur pe se a duh tih a sawi a, Sairanga FCI in godown an sak chu hna 60% vel an zawh tawh hnuah Forest lamin complaint an thehluh avangin hna thawh chhunzawm theih a ni lo tih a sawi a, rel a luh hnaih avangin harsatna awm thei niin a ngai bawk.

Vawiin Hotel Regency a press mite a kawmnaah MP Vena chuan state dangah chuan FCI in hmun tha tak tak an neih laiin Mizoramah chuan mi inluah in an la awm tih sawiin New Capital complex-ah hmunhma ngaihtuah sak se a duh hle tih a sawi a, hmunhma an dilna hi state sawrkarah pawh an thehlut tawh niin a sawi bawk. Sairanga FCI in godown an sak chu hna 60% vel an zawh tawh hnuah Forest lamin complaint an thehluh avangin hna thawh chhunzawm theih a ni lo tih a sawi a. Kumin kumtawp lamah chuan Sairang thleng rel luh tir tum a ni a, hemi hmaa godown hi sak zawh a nih loh chuan harsatna an tawk thei niin a sawi.

Rel hmangin Bairabi ah buhfai thla khatah vawi 4 vel phurhluh thin a ni tih sawiin tum khatah wagon 42 a lo thleng thin a. Mahse rel platform leh kudam inkar kawng a chhiat avangin duh angin phurh zung zung theih a ni lo a. Rel atanga buhfai hi hlanthlak har a nih chuan pawisa thahnem tak an chawi a ngai thin niin a sawi a. Wagon khat hi truck 6 phur tawk vel niin a sawi bawk. MP chuan a hmaa Pathianni a rel buhfai phur a lo thlena hlan thlak kawnga harsatna an neih thin chu an nei tawh lo tih sawiin mahse an unload theih hnuah rel hi Pathianni ah a lo thleng ngai tawh lo niin zawhna a chhang.

Food Corporation of India hotute sawi danin tun dinhmunah buhfai metric ton 15261.537 chu Mizoram sawrkar hnenah an hlan a. An kudam ah quintal 175590 an la kawl mek tih an sawi a. Sairang leh Khawzawl a godown sak zawh a nih chuan Mizoram thla 8-9 ei tur chu an chhekkhawl thei dawn niin an sawi bawk.